Ostarte zabalak zeruan asteazken honetan

Euskalmet euskal meteorologia agentziaren iragarpenaren arabera, asteazken honetan, apirilaren 8an, ostarte zabalak izango dira zeruan, baina erdi mailako hodeiekin eta goi-hodeiekin jarraituko dugu oraindik. Hegoaldeko haizea ahulago ibiliko da eta arratsaldean iparraldera aldatuko da; horregatik, Kantauri isurialdeko tenperatura jaitsi egingo da.

Mediterraneo isurialdean tenperatura maximoak igo egingo dira, eta minimoetan aldaketa handirik ez da izango. Udaberriko giroa nagusituko da. Hiriburuetan, Baionan 13 gradu espero dira gutxienez eta 23 gehienez, Bilbon 15 gutxienez eta 23 gehienez, Donostian 15 gutxienez eta 23 gehienez, Gasteizen 10 gutxienez eta 24 gehienez eta Iruñean 12 gutxienez eta 24 gehienez.

Itsasbazterrean, egunaren lehenengo partean hego-ekialdeko haizea ibiliko da 3ko indarrarekin, arratsaldean ipar-ekialdekoa 3-4koarekin, eta gauean mendebal-osagaikoa 2-3koarekin; itsaso kizkurra edo itsaskirria eragingo du. Ipar-mendebaldeko hondoko itsasoak 2 metro inguruko olatuak altxatuko ditu. Itsasgorak 08:55ean eta 21:19an izango dira, eta itsasbehereak 02:54an eta 15:09an. Uraren tenperatura 13 gradukoa da eta ikuspena hamar kilometrotik gorakoa izango da.

EUSKALMET

Euskalmet euskal meteorologia agentziak adierazi du martxoa hezea izan dela lurralde osoan, mendebaldean oso hezea izateraino iritsiz eta ekialdean normala izanik. Gainera, batez besteko tenperaturak epelak izan dira, 1991-2020 aldi normalarekiko +0,6 graduko anomalia positiboarekin.

Eusko Jaurlaritzako Segurtasun Sailetik jakinarazi dutenez, prezipitazioari dagokionez, martxoak portaera argi eta garbi hezea izan du, batez ere isurialde kantauriarrean, iparraldeko haranetan metaketa handiak erregistratu baitira.

Nabarmentzekoak dira Berastegin 241,4 mm, Eskasen 240 mm eta hainbat estaziotan 200 mm-tik gorako balioak; Araban, aldiz, balioak apalagoak izan dira, kasu askotan 60 mm-tik beherakoak (Alegria 59,8 mm, Nanclares 57,75 mm eta Paganos 55,9 mm). Halaber, Sangroniz eta Matxitxako bezalako estazioetan martxoko serie historikoetako baliorik altuenak erregistratu dira.

Prezipitazioa izan duten egunen kopurua ohikoa baino handiagoa izan da mendebaldean eta barnealdean, %30 eta %50 arteko igoerekin, bereziki Arabako Lautadan, non 15 egun inguruko prezipitazio egunak izan diren. Ekialdean, berriz, balioak ohikoen parekoak izan dira. Euriak batez ere martxoaren 5etik 15era bitarte eta azken astean pilatu dira, eta lau egunetan metaketa oso handiak izan dira, bereziki 6an eta 14an.

Garrantzi berezia izan zuen martxoaren 6ko eta 7ko pasarteak, isurialde kantauriarrean prezipitazio iraunkor eta oso ugariak izan baitziren, eta 83 mm arteko metaketak Almiken, 79,2 mm Altzolan, 72,1 mm Aizarnazabalen eta 71,5 mm Urdulizen eragin baitzituzten. Euri horien ondorioz, emariak handitu egin ziren, eta hainbat ibai maila horian egon ziren, baita zenbait puntutan maila laranjan ere, Butroi eta Gobela arroetan.