Tuvisak 1.739.739 lagun garraiatu ditu urtarrilean, iaz baino %5,45 gehiago

Tuvisa Gasteizko hiri autobusen udal zerbitzuak ia linea guztietan bidaiari kopurua nabarmen handituz hasi du 2026. urtea, azken ekitaldietan izandako goranzko joera sendotuz. Horrela, guztira, 1.739.739 pertsona garraiatu dituzte urtarrilean hiriko autobusen eguneko lineek, 2025eko hil berean baino %5,45 gehiago, Izaskun Reyes Tuvisako presidenteak iragarri duenez.

Urtarrileko datuen arabera, Tuvisaren sare osoak igoera nabarmenak izan ditu urtarrilean iazko aldi berarekin alderatuta, batez ere auzo berriak lotzen dituzten lineetan. Horren erakusgarri dira L9 Gamarra-Goikolarra linearen erabilera %18 edo L6 Zabalgana-Arkaiate linearena %13 gehitu izana.

Tuvisaren eguneko beste linea batzuek ere hazkunde garrantzitsuak izan dituzte urtarrilean: L1 Zirkularrak %14,46 (62.271 erabiltzailetik 71.277ra), L3 Betoñu-Goikolarrak %8,81ekoa (59.670etik 64.928ra), L5 Arkaiate-Elejalde-Jundizek %9,44koa (194.283tik 212.631ra) eta L10 Aldaia-Larreinek %6,12koa (167.809tik 178.087ra).

L7 Borinbizkarra-Bake linearen erabilera %2,1 gehitu da, azken bi urteetako beherakaden ondoren, eta BEIk bestalde, erabilera bolumen egonkorrari eutsi dio, %0,25eko hazkundearekin.

Bestalde, gaueko zerbitzuak iaz baino 2.282 erabilera gehiago izan ditu aurtengo urtarrilean (+%19), eta igoera horren zati handi bat G3 Armentia-Zabalganen gertatu da. Kirol ekitaldiei lotutako zerbitzuen kasuan, aldiz, 741 erabilera gutxiago zenbatu dira.

BUXen erabilerak gorantz jarraitu du, urtarrilean 1.490 pertsona garraiatu baitzituen, hau da, 2025eko hilabete berean baino %26 gehiago. Nabarmentzekoa da, halaber, zerbitzu honetan gero eta gehiago erabiltzen dela QR kode bidezko bonuaren formatua, paperezko bonu tradizionalaren aldean.

Azkenik, Tuvisako presidenteak adingabeentzako autobusaren doakotasunak ondo funtzionatzen duela adierazi du: "Beste behin ere, doako 200.000 bidaia baino gehiago egin ditugu 15 urtetik beherakoen kasuan. Haur horiek garraio publikoaren etorkizuna eta mugikortasun jasangarriagoaren oraina dira, adibidez, ikastetxeetara egiten dituzten joan-etorrietan".