Cibervoluntarios fundazioak adinekoen artean arrakala digitala murrizteko tailerrak emango ditu Gasteizen

Cibervoluntarios fundazioak lantegiak eskainiko ditu apirila eta ekaina bitartean Gasteizen, adinekoen kolektiboan arrakala digitala murrizteko helburuarekin. Gasteizko Udaleko Gizarte Politiken Sailak akordioa lortu du kolektibo horrekin Bizan Infon eta Bizan Txagorritxun saioak doan egin ditzan. Prestakuntza hori Gizarte Politiken Udal Sailak arlo honetan eskaini ohi duenari gehituko zaio.

Gasteizko Udaletik adierazi dutenez, Cibervoluntarios fundazioak eskainiko duen programa pilotuak bat egiten du Bizanen helburuekin, hau da, teknologia berrien erabilerari buruz sentsibilizatzea eta prozesu horretan prestakuntza eta laguntza eskaintzea.

Horrez gain, behar duten pertsonentzako (normalean, adin aurreratuenekoentzako) ikasturtean zehar hainbat ekintzaren bidez egiten duten lana osatuko du programak, gaur egun eguneroko bizitzako jarduera asko egiteko (mediku hitzordua eskatzea, administrazioarekin harremanetan jartzea, bankuizapideak egitea) teknologia berrien erabilera handitu egin baita, arrakala digitala desabantaila eta bazterketa arrisku bihurtuz pertsona batzuentzat.

"Teknologiarako sarbide ekitatiboa lortzeko, ezinbestekoa da gaitasun digitaletan eta IKTen erabilera arduratsuan prestatzea populazioaren segmentu desberdinak, eta horien artean dago adinekoena", adierazi du Lucho Royero Gizarte Politiken zinegotziak.

Cibervoluntarios fundazioa irabazi asmorik gabeko erakundea da, eta trantsizio digital inklusiboa bultzatzen du. Bere helburuetako bat da pertsona guztiek teknologiarako sarbidea izatea, eta teknologia ezagutu eta erabiltzeko aukera berdinak izatea lortzea, denen autonomia bultzatzeko, eskubideak indartzeko, eta enplegurako eta gizartean parte hartzeko aukerak hobetzeko.