2026rako TAO bereizgarria berritu nahi ez dutenek urtarrilaren 1a baino lehen izapidetu beharko dute baja

Gasteizko Udalak automatikoki berrituko dizkie 2026. urteko TAO bereizgarriak egoiliarrei, saltokiei, profesionalen gremioei eta autonomoei, inolako izapiderik egin beharrik gabe.

TAO bereizgarriak digitalak dira irailaren 15etik, eta, beraz, ez da txartel fisikorik bidaltzen etxera. Berritze prozesua telematikoki edo herritarren arretarako bulegoetan aurrez aurre kudeatuko da, lur gaineko aparkalekua arautzen duen ordenantzan ezarritakoaren arabera, Gasteizko Udaletik jakinarazi dutenez.

Horrela, 2026rako automatikoki berrituko dira 2025eko azaroaren 28a baino lehen helbideratuta zeuden pertsona eta establezimenduen egoiliarrentzako, saltokientzako, gremio profesionalentzako eta langile autonomoentzako TAO bereizgarriak, betiere ordenantzaren baldintzak betetzen jarraitzen badute; bestela, bereizgarriari baja emango zaio automatikoki.

Eskatzailearen jabetzakoak ez diren ibilgailuei lotutako egoiliarren bereizgarrien kasuan ere, 2026rako bereizgarriak automatikoki berrituko dira, baldin eta eskatutako baldintzak mantentzen badira.

2026rako TAO bereizgarria berritu nahi ez dutenek urtarrilaren 1a baino lehen izapidetu beharko dute baja Gasteizko Udalaren egoitza elektronikotik (https://sedeelectronica.vitoria-gasteiz.org) edo aurrez aurre herritarren arretarako edozein bulegotan. Bajak izapidetzen den egunetik bertatik izango du eragina.

Herritarrek TAO bereizgarriaren egoera kontsultatu eta edozein zalantza argi dezakete egoitza elektronikoaren bidez, herritarren arretarako bulegoetan edo 010 eta 945 16 11 00 telefonoetara deituta.

Izapidetze lanak erraztu, beharrezkoak ez diren kudeaketak murriztu eta TAOren erabiltzaileei sistema arinagoa eta irisgarriagoa eskaini nahi ditu Gasteizko Udalak neurri honen bidez.