Gasteizko udal aparkalekuen sareak bizikletentzako modulu berri bana ditu Sansomendin eta San Martinen

Gasteizko VG Biziz udal aparkalekuen sareak bizikletentzako modulu berri bana ditu Sansomendiko Ramon Rubial kalean eta San Martingo udal bulegoen ondoan ostegun honetatik. Bi gune berriekin, bizikletentzako aparkaleku seguruen udal sareak 20 kokaleku eta 1.304 plaza ditu auzoetan banatuta.

Beatriz Artolazabal Espazio Publikoaren eta Auzoen zinegotziak azaldu duenez, "aparkaleku horiei esker, herritarrek lasai gorde ditzakete bizikletak, lapurreten eta bandalismo ekintzen aurrean babestuz".

"Funtsezko urratsa dira mugikortasun jasangarriko ohiturak sustatzeko eta Gasteizek bizikleta bidezko mugikortasunean erreferente izaten jarrai dezan. Gainera, etxean bizikleta gordetzeko lekurik ez duten pertsona askorentzat irtenbide praktikoa eskaintzen dute, eta horrek are gehiago errazten du eguneroko erabilera", esan du.

Azpiegitura horiek alternatiba eraginkorra eskaintzen dute bizikleten lapurretaren aurrean, eta egunero garraiobide gisa erabiltzea ere errazten dute, hiri ingurune atseginagoa, garbiagoa eta osasungarriagoa bultzatuz.

BALORAZIOA

"Hiri jasangarria eraikitzen jarraitzen dugu, eta horrek bizikletaz mugitzen direnei benetako irtenbideak eskaintzea eskatzen du. Azpiegitura erosoak, gertukoak eta babestuak nahi ditugu, bizikletak gero eta protagonismo handiagoa izan dezan eta bizi kalitate hobea lortzen lagun dezan", nabarmendu du zinegotziak.

Bestalde, une honetan kontratazio fasean daude bizikletentzako bi aparkaleku berri: bata Santa Luzia auzoan kokatuko da, Jacinto Benaventeko skate parkaren ondoan, eta bestea Zaramagan, La Vitorianaren futbol zelaiaren ondoan eta El Boulevard merkataritza gunearen inguruan.

Horrela, Gasteizko Udalak auzoetako mugikortasun jasangarria indartuko duen sarea zabaltzen jarraitzen du, eta gero eta pertsona gehiago bizikletaz modu seguru eta erosoan mugitu ahal izatea errazten du.