Gasteizko Udalak 131.000 euro inbertituko ditu Abetxukuko Presa kaleko haur parkea berritzeko

Gasteizko Udalak osorik berrituko du Abetxuku auzoko Presa kalean dagoen haur parkea, 131.000 euro inbertituta. Auzotarrek askotan eskatu izan duten esku hartzea da, egungo jolas eremua nabarmen hondatuta dago, zorua altxatuta dago eta ekipamenduak zaharkituta.

Lanek erabat eraldatuko dute aisialdi eremua, jolasgune berriak eta elementu inklusiboak jarrita, eta adin desberdinetako haurren jolasa hobetzeko pentsatutako banaketa eginda, Gasteizko Udaletik jakinarazi dutenez.

Jarduera aipagarrienen artean daude hondar eremu handi bat sortzea, jolas integratuekin; tirolina bikoitz bat instalatzea erakartzeko elementu berri gisa, eta kautxuzko zoladura izango duen joko-uharte irisgarriak jartzea. Egokitutako zabuak, karrusel integratzailea eta joko birakariak egongo dira espazio horietan.

Esku hartzeak irisgarritasun unibertsala ere hartuko du kontuan, gaitasun desberdinak dituzten haurrentzat pentsatutako jolas eta ibilbideekin. Hori guztia inguruneko elementu naturalak errespetatuz gauzatuko da, hala nola lehendik han dauden zuhaitzak.

BALORAZIOA

Beatriz Artolazabal Espazio Publikoaren eta Auzoen zinegotziak nabarmendu duenez, berrikuntza hori "Abetxukuko bizilagunekin gure gain hartutako konpromisoa da, aisialdi eremu horretan hobekuntzak eskatzen ari baitziren. Gure Auzoen Planean jasota dago, eta inbertsio esanguratsuarekin gauzatuko dugu. Gure helburua argia da: auzo guztiek kalitatezko espazio publikoak eta haurren gozamenerako egokiak izatea", ondorioztatu dute Gasteizko Udaletik prentsa ohar baten bitartez.