Gasteizko udalbatzak TAO lur gaineko aparkaleku mugatua arautzen duen ordenantza berria onetsi du asteazken honetan, udal gobernua osatzen duten PSE eta EAJren eta Elkarrekin-Podemos taldearen aldeko botoekin. EH Bildu abstenitu egin da, eta PPk kontra bozkatu du.
Araudi berria irailaren 15ean jarriko da indarrean, emisio gutxiko eremua indarrean sartzearekin batera. Lurrazalean aparkatzeko sistema eguneratu eta modernizatuko duen ordenantza da, hiriaren eta bertako biztanleen behar berrietara egokituz, Gasteizko Udalaren arabera.
Hain zuzen, Beatriz Artolazabal Gasteizko alkateorde eta Espazio Publikoko eta Auzoetako zinegotziak osoko bilkuran azaldu duenez, ordenantza "ez da aldaketa tekniko hutsa, udal mugikortasun politikaren funtsezko pieza bat baizik. Ez da inposizio bat, erantzun bat da. Ez da zigor bat, konponbide bat baizik".
Ildo horretan, araua auzo elkarteekin, merkatariekin, gremioekin eta profesionalekin landu da, eta haien ekarpenak eta eskaerak jaso dira.
Helburu nagusien artean daude tentsionatutako eremuetan bizi diren egoiliarrentzako aparkalekurako sarbidea hobetzea, egunero ibilgailua lanera joateko erabili behar dutenen lana erraztea eta auzoak bizitegi espazio gisa babestea.
Ordenantza berria "argiagoa, arinagoa eta egungo errealitatera egokituagoa" da, eta espazio publikoaren erabilera antolatzeko tresna eraginkorra izango da. Udalak azpimarratu du araua ez dela "bulego batetik iristen, kaletik baizik, prozesu zorrotz, elkarrizketatu eta partekatuaren ondorioz".
Eraberritzeak eremu arautuak nabarmen handitzea ekarriko du. Horrela, TAO plazak 6.000tik 11.000ra igaroko dira, Arana, Aranbizkarra, Santa Luzia, San Martin eta Aranzabal auzo berriak sartuz eta Adurtzan TAO zabalduz, Triana kalearen inguruan.
Era berean, gremio eta autonomoei zuzenduta, denbora mugarik gabe eta tiketa eskuratu behar gabe hiriko TAO gune guztietan aparkatzeko aukera emango dien TAO bereizgarri espezifikoa sortzea aurreikusten du ordenantzak.
Gainera, kargatzeko eta deskargatzeko TAO gune berria ezarriko da, doakoa, gehienez 30 minutukoa, profesionalek espazio horiek txandaka eta modu partekatuan erabil ditzaten.
