Merkataritzaren salmentak %2,6 gehitu dira hirugarren hiruhilekoan EAEn

Merkataritza sektorearen salmentak %2,6 gehitu dira urte artean Euskal Autonomia Erkidegoan (EAE) 2025eko hirugarren hiruhilekoan, prezio konstanteetan eta egutegiko eraginak zuzenduta. Aurreko hiruhilekoaren aldean, berriz, dagozkion urtaro eraginak kenduta, salmentek %1,4 egin dute gora, Eustat euskal estatistika erakundearen arabera.

Merkataritza sektorearen barnean daude handizkako merkataritza, txikizkako merkataritza eta motordun ibilgailuen salmenta eta konponketa.

Hala, eta ildo horretatik jarraituz, Eustaten txostenaren arabera, salmenten urte arteko bilakaera positiboa izan da sektore guztietan urteko hirugarren hiruhilekoan, prezio konstanteetan eta egutegiko eraginak zuzenduta. Horrela, motordun ibilgailuen salmenta eta konponketa sektorean %11,5 hazi dira, txikizkako merkataritzan %3,8 eta handizkako merkataritzan %0,5.

Aurreko hiruhilekoaren aldean, urtaro eraginak kenduta, motordun ibilgailuen salmenta eta konponketan %4,3 igo dira salmentak, txikizkako merkataritzan %1,1 eta handizkako merkataritzan %0,8.

Salmenten urte arteko portaera positiboa izan da hiru lurralde historikoetan: Gipuzkoan %3,3 hazi dira salmentak, Araban %2,4 eta Bizkaian %2,2. Aurreko hiruhilekoarekiko, aldiz, Araban %2,2ko igoera egon da salmentetan, eta Bizkaian eta Gipuzkoan %1,2nakoa.

Azkenik, EAEko merkataritza sektoreko landunen indizea %1,5 hazi da 2025eko hirugarren hiruhilekoan aurreko urteko aldi beraren aldean, eta %0,8 bigarren hiruhilekoaren aldean, ondorioztatu dute Eustatetik.