Jaurlaritzak 480.000 euro bideratuko ditu arte plastiko eta bisualen jarduerak laguntzera

Arte plastiko eta bisualen esparruan jarduerak sustatzeko eta garatzeko 2024ko ekitaldiko diru laguntzak emateko deialdia onetsi du aste honetan Eusko Jaurlaritzako gobernu kontseiluak, eta Kultura eta Hizkuntza Politika Sailak 480.000 euro erabiliko ditu.

Jaurlaritzako arduradunen arabera, alde batetik, 55.000 euro bideratuko dira arte plastikoen eta bisualen eremuan arte garaikideko gertakizun eta adierazpenak antolatzera, hala nola erakusketak, lehiaketak, biltzarrak, jardunaldiak, lantegiak edo hitzaldiak, helburu badute Euskadin bizi diren artistak sustatzea eta zabaltzea eta Euskadin arte garaikidea sustatzea. Jarduketak Euskal Autonomia Erkidegoan (EAE) gauzatu beharko dira.

Beste alde batetik, 135.000 euroko aurrekontu saila izango da arte plastiko eta bisualen inguruan euskarri desberdinetan argitalpenak egiten laguntzeko, beren xedea Euskal Herriko arte garaikidea zabaltzea eta bertako artistak eta haien lana sustatzea bada.

Azkenik, 290.000 euro banatuko dira arte plastiko eta bisualen sorkuntza ekoizpenaren eremuan proiektuak egiten laguntzeko, hala nola artelanak ekoiztea eta ikertzea. 5.000 euroko 22 laguntza, 8.000 euroko 18 laguntza eta 12.000 euroko 3 laguntza banatuko dira.

Laguntzotan interesa dutenek hilabeteko epea izango dute proiektuak aurkezteko deialdia Euskal Herriko Aldizkari Ofizialean argitaratu eta biharamunetik. Iazko deialdian 64 proiektu lagundu ziren diruz: bost sustapen zabalkundearen modalitatean, 16 argitalpenen modalitatean eta 43 sorkuntza ekoizpenaren modalitatean.