EHUko gobernu kontseiluak 531 milioi euroko aurrekontu proiektua onartu du 2024rako

Euskal Herriko Unibertsitateko (EHU) gobernu kontseiluak 531.031.332 euroko aurrekontu aurreproiektua onartu du 2024rako Bilboko Bizkaia Aretoan egindako bileran, 2023ko aurrekontua baino %7,38 handiagoa. Aurrekontu proiektua Gizarte Kontseiluari aurkeztuko zaio orain, egoki baderitzo martxoaren 13an onar dezan.

EHUko iturriek jakinarazi dutenez, proposatu den kopurutik, 466.148.132*euro aurrekontu arruntari dagozkio, 39.433.200*euro programa kontratuei, 25.000.000*euro Inbertsioen Urte Anitzeko Planari eta 450.000*euro Gizarte Kontseiluari.

Aurrekontu osoaren %72,79 Euskal Autonomia Erkidegoko (EAE) aurrekontuetatik datoz, eta %27,21 kanpoko iturrietatik. Kanpo sarrera horien %8,42 tasei dagozkie, eta gainerako %18,79 unibertsitateak bere jardunetik sortutako sarrerei (kanpoko kontratuak, ikerketa proiektuak, berezko tituluak eta abar).

Aurrekontuko 32 milioi euro azpiegiturak hobetzeko erabiliko dira (25*milioi euro Medikuntza eta Erizaintza Fakultatearen eraikin berrirako), Azpiegiturak Hobetzeko Urte Anitzeko Plan Bereziari lotutako beste inbertsio batzuekin batera, eraikinen jasangarritasuna, irisgarritasuna eta segurtasuna hobetzeari begira.

Era berean, bost milioi euro izendatu dira Unibertsitate Sistemaren Lege Organikoa ezartzeko, irakasle laguntzaile doktoreen irakas ahalmenaren murrizketak kontratazio berrien premia ekarri baitu.

Aurrekontuen proiektua onartuta, EHUko errektore Eva Ferreira esker ona agertu da ekimenak jasotako babes zabalagatik. Bere hitzetan, "gaurdanik, tresna on bat daukagu ekitaldi honi aurrera egiteko: oso positiboa iruditzen zait aurrekontu hauek onartu izana".

Azkenik, aurrekontuen nobedadeetako batzuk azpimarratu ditu, hala nola ikerketa intentsiboko guneak sustatzeko kontu saila, fakultateek eta eskolek plan estrategikoari lotuta antolatzen dituzten jardueretarako beste bat, eta, azkenik, unibertsitateak jasotzen dituen dohaintzetarako aurreikusi den diru sarrerena.