Laboral Kutxa-Euskadi Fundazioa taldeak Emakumezkoen Frantziako Tourrari ekingo dio, abuztuaren 12tik 18ra ospatuko den denboraldiko erronka nagusiari. Laboral Kutxak ilusioz, gogoz eta handinahiaz beteta adierazi da. Lasterketa Rotterdamen hasi eta Alpe d 'Huezen bukatuko da.
Ane Santestebanek eta Usoa Ostolazak ordezkatuko dute taldea Frantziako errepideetan. Azkenekoz, Joane Somarribak 2003an Bizkaia-Panda taldearekin lehiatu zuenetik emakumezko talde bat itzultzen da Tourrera.
Munduko lasterketarik onenean, LABORAL Kutxa-Euskadi Fundazioa taldeak herrialde baten bandera astinduko du. Izan ere, proiektuak 2019tik izan duen hazkunde iraunkorra mugarri berri bat bete du, eta hirugarren itzuli handian lehiatuko da aurten, Espainiako Itzuliaren eta Italiako Giroaren ondoren.
Laboral Kutxak prentsa-ohar batean azaldu duenez, Yurani Blanco, Usoa Ostolaza, Ane Santesteban, Debora Silvestri, Catalina Soto, Cristina Tonetti eta Laura Tomasi dira Frantziako itzuliari aurre egiteko aukeratu dituzten zazpi txirrindulariak, Ion Lazkano eta Peio Goikoetxearen zuzendaritzapean.
Ion Lazkano, LABORAL Kutxa-Euskadi Fundazioa taldeko kirol arduradunak hurrengoa adierazi du: "Gogoa eta ilusioa ez zaizkigu faltako. Giroan maila ona eskaini genuen eta orain esperientzia hori badaukagu. Maila pixka bat altuagoa izango da hemen, Tourra Tourra delako, baina taldea hobeto iritsiko dela ere uste dut, bai liderrek bai lan egin beharko duten gainerako taldekideek. Nahiz eta gure lehenengo Tourra izan, tropela aski ezaguna dugu eta aurkariak urtean zehar izan ditugunak izango dira".
