Arabako Foru Aldundiak Aktibatu Araba Turismo Adimenduneko Plataforma hedatzeko eta aktibatzeko faseari ekin dio. Plataforma horrekin, lurraldea aurrera doa kudeaketa turistikoko eredu adimendunago eta konektatuago baterantz, datuen erabileran oinarrituta, estrategia «eraginkorragoak eta jasangarriagoak» diseinatzeko. Hala, lehenengo azterketa eta definizio fasearen ondoren, proiektua puntako tresna digitalak garatzeko eta ezartzeko etapan sartzen da orain.
Etapa berri honetan, Foru Aldundia hainbat ardatz estrategikotan ari da lanean aldi berean: erakundeko talde teknikoekin eta kuadrillekin koordinatzea, proiektua aktibatzea errazteko Aktibatu Araba hedatzea lurraldeko esparru gisa, ibilbideak eta materialak prestatzea profil teknikoak eta enpresak sartzeko, eta proiektuaren parte diren soluzioak aurreratzea (hala nola etorkizuneko turismo txartela eta adimen turistikoaren sistema).
Cristina González Enplegu, Merkataritza, Turismo eta Foru Administrazioko foru diputatuak azaldu duenez, Arabako Turismo Adimenduneko Plataformaren garapena «fase erabakigarri batean sartzen da, proiektua tresna eta aplikazio digital zehatz bihurtzen hasten delako, bai eta lurraldean erabiliko duten pertsona, erakunde eta enpresentzako benetako aktibazioko ibilbide orri batean ere».
«Gure helburua da Arabako Turismo Adimenduneko Plataforma maila teknologiko edo kontzeptual batean ez geratzea, baizik eta tresna erabilgarri bihurtzea turismo kudeaketa hobetzeko, adimen partekatua sortzeko eta erabakiak hartzea errazteko bai talde teknikoei bai enpresa sareari», gaineratu du.
Abian dauden lan ildoen artean, datuei lotutako lehen aplikazio praktikoak definitzea eta lurraldeko baliabide turistiko batzuetan "sentsoreak" instalatzea nabarmentzen da. Horri esker, informazio partekatuarekin eta agregatuarekin lan egin ahal izango da bai plangintza, bai baliabideen kudeaketa eta bai eskariaren portaeraren ezagutza hobetzeko; eskari hori aisiagatik zein lanagatik Araba bisitatzen duten bidaiariena da.
Enoturismoaren eremuan, proiektuak aukera emango du bidaiarien etorrerarekin eta mugimenduarekin lotutako adierazleak lortzeko, esaterako: guztizko bisitari kopurua, uneko okupazioa, ordu tarteen araberako jendearen bertaratzea, urtarokotasun indizea, lekuen araberako eskariaren banaketa, egonaldien batez besteko iraupena, itxarote tarteak edo puntu eta baliabide turistiko desberdinen arteko fluxuak.
Horrekin batera, industria baliabideekin lotutako aplikazioak ere lantzen ari dira. Aplikazio horietan bisitarien joan-etorriei eta mugimenduei buruzko informazioa baliabidearen beraren egoera fisikoari eta mantentzeari lotutako aldagaiekin gurutzatuko da, erabilerari eta kontserbazioari buruzko adierazleak txertatuz. "Proiektua aplikazio zehatzetan lurreratzeko urratsak egiten ari gara, fluxu turistikoek nola jokatzen duten, baliabideak nola erabiltzen diren eta helmuga hobeto kudeatzen lagun diezagukeen informazioa hobeto ezagutzeko", adierazi du Cristina Gonzálezek.
Aktibazioa, prestakuntza eta lehen ibilbideak
Etapa berri horrek berekin dakar, halaber, Aktibatu abian jartzea, hots, Arabako Turismo Adimenduneko Plataforma aktibatzeko gida digitala. Aktibatzeko espazio digital komun horrek teknikarientzako eta turismo enpresentzako prestakuntza ibilbideak, material praktikoak, webinarrak (online mintegiak) eta tailerrak gaituko ditu. Helburua da etorkizuneko erabiltzaileak gaitzea: plataforman sartzen lagunduz plataforma bera sakonago ezagutuko dute eta proiektuak eskaintzen dituen tresnak, datuak eta zerbitzuei etekina atera ahal izango diote.
Enplegu, Merkataritza, Turismo eta Foru Administrazio Saila lanean ari da jada lehen mugarri horien egutegia prestatzen: hasieran erakundeko eta kuadrilletako teknikariei emango zaie arreta eta, ostean, enpresak pixkanaka ekosisteman sar daitezen bideratuko da lana. Foru diputatuak azpimarratu duenez, "tresnak onartzea, ulertzea eta lurralderako balio erreala sortzea funtsezkoa da turismoaren eraldaketa digitalak zentzua izan dezan lortzen badugu. Horrexegatik da hain garrantzitsua aktibazio fase hau: egitasmoa tresna erabiltzaile izango direnekin lotuko duelako".
Lurraldearen lehiakortasun turistikoa hobetzekotan, Aktibatu Arabak aurrera darrai Araban helmuga turistiko adimenduneko eredua garatzeko, teknologia, datuak, laguntza eta aplikazio zehatzak konbinatzen dituen tresna baterantz.
Aurkezpen ekitaldia
Prozesu horrek maiatzean aurrera jarraituko du, aurkezpen instituzional baten bidez Vitoria-Gasteizen. Ekitaldi horretan Arabako turismo sektoreko eragile publiko eta pribatuak eta profesionalak bilduko dira, proiektuaren xehetasun guztiak ezagutarazteko eta lurraldean haren aktibazioa finkatzeko.
