BBK-k 109 azoka babestuko ditu 2026an Bizkaiko 74 herritan eta milioi bat baino gehiago bideratuko du lehen sektorera

BBK-k milioi bat euro baino gehiago erabiliko ditu 2026an lehen sektorea bultzatzen jarraitzeko, Bizkaiko 74 udalerritan 109 azoka antolatuz, iaz baino bi gehiago, bai eta BBK Azoka merkataritza elektronikoko plataformaren bidez ere, non lurraldeko 55 ekoizlek parte hartzen duten eta, denboraldiaren arabera, 500 produktu baino gehiago eskaintzen diren.

Unai Rementeria BBK-ko presidentea Igorreko Uxarbeiti baserrian izan da asteazken honetan, eta Urtza Sarrionandia eta Edurtzeta Atutxa 40 urte baino gehiago dituen nekazaritza ustiategiaren buruek bertan nola lan egiten duten erakutsi diote.

Rementeriak nabarmendu du BBK-k ibilbide luzea duela lehen sektorea babesten. Hala, gogorarazi duenez, 1977an, erakundea Bizkaiko nekazaritza-abeltzaintzako azokak antolatzen laguntzen hasi zenean, BBK-k dozena bat azoka babesten zituen Bizkai osoan, eta, orain, 2026an, "109 azoka babesten eta antolatzen ari gara 74 udalerritan, Bilboko San Tomas azoka barne", baita azoka "enblematikoak" ere, hala nola Abadiño, Bermeo, Muskiz, Gernika edo Zamudiokoak.

"Ondo inbertitutako milioi bat euro, gure baserritarrengandik gertu egon nahi dugulako eta lurraren iraunkortasuna eta gure ekoizleen lehiakortasuna babestu nahi ditugulako", nabarmendu du Rementeriak. Era berean, BBKren helburua "Bizkaiko lehiakortasun iraunkorra indartzea" dela ziurtatu du, "gure baserritarrei lagunduz eta kalitatezko produktuen merkaturatzea sustatuz".

BBK AZOKA

Ohiko azokei laguntzeaz gain, banku fundazioak BBK Azoka zuzeneko salmentarako online plataformaren ikusgarritasuna, baserritar berriak erakartzea eta platafora logistikoaren hobekuntza bultzatzen jarraituko du aurten.

Rementeriak nabarmendu duenez, merkataritza elektronikoko plataformak jardunean dauden ustiategi txiki eta ertainetako 55 ekoizle ditu gaur egun, eta, denboraldiaren arabera txandakatuta, urtean zehar 500 tokiko produktu eskaintzen dituzte, hala nola barazkiak, fruta, eztia, arrain kontserbak, esnekiak, marmeladak, hestebeteak edo txakolina, besteak beste. "Baserritik, zuen etxera", azpimarratu du.

BBK Azokak balioa ematen dio tokiko produktuak eguneroko kontsumoan sartzeari, elikadura "kontzienteagoa eta osasungarriagoa" sustatuz. "Eredu horren alde egiteak, erosketa esperientzia aberasteaz gain, landa ingurunearen babesa indartzen du eta ustiategi txikien iraunkortasunari laguntzen dio", adierazi du.

BBK-k zein atxikitako ekoizleek BBK Azokaren jarduera sendotzea espero dute, nekazaritzako elikagaien sektoreak "ez duelako salmenta kanal digitaletatik bereizi behar, hurbileko produktua erosi nahi duten eta online erosketa aukerarik onena dutenentzat kontsumitzaileen profil berrietara egokitu nahi badu".

Berrikuntza gisa, aurten azoketako batzuek proposamen ludiko bat izango dute futbolin txapelketak antolatuz, guneak dinamizatzeko eta publiko berria erakartzeko. Irabazleek azoka bakoitzean dauden ekoizleen artikuluekin egindako produktuen saskiak jasoko dituzte. Ekimena ekainaren 21ean estreinatuko da Mungiako azokan.

UXARBEITIA BASERRIA

Igorreko Uxarbeiti baserria familia ustiategia da, eta 1980ko hamarkadatik tokiko ekoizpenari lotuta dago. Gaur egun, Urtxa Sarrionadia da proiektuaren buru, Edurtzeta Atutxa amarekin batera, belaunaldien arteko erreleboa islatuz, "emakumeek gidatua eta lehen sektorearen etorkizunarekin konprometitua", nabarmendu du BBK-k.

Ustiategiak sasoiko fruta eta barazkiak uztartzen ditu, kiwi eta sagarrondoak nabarmenduz, eraldatutako produktuen elaborazioarekin batera, hala nola marmeladak, kontserbak, zukuak eta kiwi likorea. Gainera, oilo arrautzak ekoizten ditu, eta Amorebieta-Etxanoko eta Arratiako haraneko saltokietan saltzen dituzte.

Uxarbeiti baserriak nekazaritza azoketan parte hartu ohi du eta BBK Azoka plataformako kidea da, nekazaritza eredu "iraunkor, lurraldean errotu eta tokiko produktuaren balorizazioan oinarrituaren" aldeko apustua eginez.

Urtza Sarrionandiak "sektorea profesionalizatzeko" BBK-k eta Bizkaiko Foru Aldundiak egiten duten laguntza eskertu du. "Digitalizazio garaian gaude, modernizatu egin behar gara eta, gu asko mugitzen garen arren, sektore publikoaren beharra ere badugu", nabarmendu du.

Adierazi duenez, gaur egun, ustiategiak 3.000 metro koadro baratze, bi hektarea kiwi eta 1,5 hektarea sagarrondo ditu, oilo eta erleekin batera, "baina dena kopuru txikian".

"Alde positiboa da generoa guk egiten dugula eta zuzenean saltzen dugula, ereitetik elaboratu arte, eta bezeroekiko gertutasun horrek egiten gaitu desberdin", ziurtatu du.

Orobat, duela bost urte produktu eraldatuak saltzen hasi zirela gogorarazi du, hala nola piparra botilaratua, marmelada konfituran eta kiwi likorea. "Produktu berriak probatzen ditugu, eta funtzionatzen duten neurrian, haiekin jarraitzen dugu edo baztertu egiten ditugu", azaldu du.

Azkenik, Sarrionandiak zehaztu du azoketan bakarrik saltzen dutela, eta, gogorarazi duenez, "urtean behin merkatua izaten hasi zena, apurka-apurka" bere gurasoek "handitu egin zuten, batez ere eskatzen zigutenagatik".