Kirolaraba Fundazioak 190.000 euro banatuko ditu goi mailako kirol klub eta elkarteentzako laguntzetan

Kirolaraba Fundazioak goi mailako kirol klub eta elkarteentzako 2026rako laguntza deialdia onetsi du, 190.000 euroko aurrekontuarekin. Laguntza lerroaren helburua da Arabako Lurralde Historikoko eta Trebiñuko enklabeko kirol erakundeei laguntzea, baldin eta kategoria absolutuko taldeak badituzte eta beren modalitateko maila gorenean lehiatzen badira. Horrela, beren kirol jarduera garatzeko behar dituzten baliabideak bermatzen lagunduko die.

Arabako Foru Aldunditik jakinarazi dutenez, laguntzak norgehiagoka bidez emango dira, eta 2025eko irailaren 1etik 2026ko abuztuaren 31ra bitartean federatutako lehiaketa ofizialetan parte hartzen duten klubei zuzenduta daude, baldin eta dagokien erregistroan inskribatuta badaude.

Deialdia asteazken honetan argitaratu da Arabako Lurralde Historikoaren Aldizkari Ofizialean, eta kirol jarduerari lotutako hainbat gastu mota finantzatzea aurreikusten du, besteak beste, teknikariak eta laguntzaileak (entrenatzaileak, monitoreak, mekanikariak eta abar); zerbitzu medikoak, fisioterapia eta beste zerbitzu espezializatu batzuk; lizentziak, ekipamenduak eta kirol materiala; instalazioak alokatzea; federazioaren arbitrajeak eta tasak, eta lehiaketak dirauen bitarteko joan-etorriak, ostatua eta mantenua. Gainera, kudeaketako zeharkako gastuak ere barne hartuko dira (diruz lagun daitekeen aurrekontuaren %15 edo gutxiago).

Arabako Foru Aldundiaren egoitza elektronikoaren bidez egin beharko dituzte eskaerak kirol erakundeek, eta apirilaren 20ra arteko epea dute. Erakunde bakoitzak eskaera bakarra aurkeztu ahal izango du, eskatutako dokumentazioa eta dagokion federazioaren ziurtagiria barne.

Ebazpena sei hilabete igaro baino lehen jakinaraziko da, eta laguntza bi fasetan ordainduko da: lehen ordainketa, %50ekoa, aurrerakin gisa, eta bigarrena jarduera justifikatu ondoren. Justifikazioa 2026ko irailaren 30a baino lehen aurkeztu beharko da, justifikazio kontu sinplifikatuaren bidez.