Xare Euskarazko Kultura Digitalaren VI. Jardunaldiak egingo dira datorren astean Donostian

Donostiako Udaleko Euskara Zerbitzuak Xare Euskarazko Kultura Digitalaren VI. Jardunaldiak antolatu ditu datorren asterako DBH 4 eta Batxilergoko lehen mailako ikasleentzat. Hitzordua EHUko Ibaetako campusean izango da, abenduaren 9an eta 10ean.

Donostiako Udalak jakinarazi duenez, Xare jardunaldiek helburu bikoitza dute: batetik, informazioaren eta komunikazioaren teknologien arloan euskararen erabilera sustatzea, eta, bestetik, euskarazko kultura digitala ezagutaraztea.

Horrela, ikasleek goiz osoa emango dute EHUren Gipuzkoako campusean, hiru gune nagusitan banatuta: Ikas gunea, Era gunea eta Jolas gunea. Egitarauari dagokionez, zortzi lantegi izango dituzte lanabes digitaletan trebatzeko eta horien aplikazio errealak ulertzeko, bi hitzaldi interaktibo arrasto digitalaz eta sare sozialetan modu arduratsuan jarduteko moduaz hausnartzeko, eta 'Egunean Behin' jokoan eta 'Zainduz Saretu' ihes-gelan jokatzeko aukera izango dute.

Bestalde, Bigarren Hezkuntzako Ikastetxeetako Euskara Batzordeen 7. Topaketa egingo da abenduaren 12an Tabakaleran, eta euskara sustatzeko motibazioa duten 130 bat gaztek elkar ezagutu eta jardungo dute bilkura horretan.

Donostiako Udalaren arabera, gaur egungo donostiar gazte gehienek euskara erabiltzeko gaitasuna duten arren, joera handia dute gaztelaniaz hitz egiteko. Egoera horri aurre egin eta euskararen presentzia eta erabilera areagotzeko asmoz ikasleez osaturiko euskara batzordeak eratzen dituzte zenbait ikastetxetan.

Gazte horiek ikasturtean zehar hizkuntzaren erabilera sustatzeko eta euskararekiko sentiberatasuna sustatzeko hainbat ekintza egiten dituzte eskolaren eremuan. Bada, abenduaren 12an antolatuko den topaketak motibazio bera duten beste zenbait gazte ezagutzeko eta ekimen bateratuak antolatzeko aukera emango die 14-17 urte bitarteko gazteei.

Topaketan parte hartuko dute Aldapeta Maria, Altza BHI, Antigua-Luberri BHI, Arantzazuko Ama BHI, Ekintza, Lauaizeta BHI, La Asuncion, San Luis La Salle, Usandizaga BHI eta Zurriola ikastetxeek.

Euskara batzorde dinamiko eta jendetsuak osatu dira aurtengo ikasturtean aipatu ikastetxeetan, eta Tabakaleran batzorde horietako ordezkari batzuk bilduko dira, 130 bat lagun guztira.

Aurtengo ikasturtean elkarlanerako urrats bat gehiago ere egin dute euskara batzordeek, eta Tabakalerako topaketa baino lehenago euskarazko musika zerrendak osatzen aritu dira. Topaketaren ondoren, urtarriletik martxora, Korrikarekin lotura duten ihes-gelak prestatuko dituzte, 24. Korrika 2026ko martxoaren 19tik 29ra izango baita.