EAEko saltoki eta elikadura kate handietako salmentak %0,1 gutxitu dira urrian iazkoen aldean

Euskal Autonomia Erkidegoko (EAE) mertakaritza gune eta elikadura kate handietako salmentak %0,1 murriztu dira urrian aurreko urteko hil beraren aldean, prezio konstanteetan eta egutegiaren eraginak zuzendu ondoren. Irailarekin alderatuta, prezio konstanteetako salmentak %1,2 jaitsi dira, dagozkien urtaro eraginak kenduta, Eustat euskal estatistika erakundearen datuen arabera.

Salmenten urtea arteko bilakaera positiboa izan da urrian gainerako produktuak sektorean, %0,1eko igoera izan baita; elikadura sektorean, aldiz, salmentak %0,2 murriztu dira iazko urriarekin alderatuta. Hil arteko datuei dagokienez, bilakaera negatiboa izan da elikagaiak (-%1,4) zein gainerako produktuak (-%0,9) sektoreetan.

LURRALDEKA

Lurraldeka, saltoki eta elikadura kate handietako salmentak %0,1na hazi dira urrian Bizkaian eta Gipuzkoan aurreko urteko hil berarekiko, eta Araban %1,1 egin dute behera. Hil arteko datuei dagokienez, salmentak %0,8 jaitsi dira Araban, %1,3 Bizkaian eta %1,2 Gipuzkoan.

Bestalde, urteko lehen hamar hilabeteetako tasa metatuan, merkataritza gune eta elikadura kate handietako salmentak %0,6 gehitu dira 2024ko aldi metatu beraren aldean. Herrialdeka, salmentak %1,2 gehitu dira Bizkaian, Gipuzkoan berdin mantendu dira, eta Araban, berriz, %0,3 jaitsi dira.

Azkenik, EAEko saltoki eta elikadura kate handietako langile okupatuen kopurua %0,3 txikitu da urrian iazko hil berarekin alderatuta, eta %1,4 gehitu hilabete artean. Urtarriletik urrira, langileen kopurua %1,5 igo da, ondorioztatu dute Eustatetik.