Gizarte Politiketako Sailak neguko harrera-baliabide berri bat zabalduko du laster kalean dauden pertsonentzat

 Gasteizko Udalak neguko harrera zerbitzu berri bat irekiko du laster kalean dauden pertsonentzat. Baliabide berria Zaramagako Santa Isabel lehengo haurreskolan dago, eta negu honetan egongo da eskuragarri behin-behinean. Ondoren, lokal hori bera berrituko da zerbitzua modu egonkorrean eta prestazio handiagoekin martxan jartzeko 2026aren amaieratik.

Lucho Royero Gizarte Politiketako zinegotziak azaldu duenez, beste kokaleku batzuk baloratu ondoren, eta haurreskolako behin betiko obren lizitazio prozesuarekin batera, Gizarte Politikak taldeak neguko arretarako behin-behineko dispositiboa lokal berean irekitzea erabaki du.

Espazioa oinarrizko eran egokitu da 24 plaza berri eskaintzeko, gaur egungo 40 plazei gehituta. Zerbitzua «ate irekien egunak» irizpidearen arabera aktibatuko da tenperatura baxuak, elurra edo bestelako eguraldi txarrak daudenean. “Gainera, lanean jarraitzen dugu 64 plaza horiek negu honetarako zabaltzen saiatzeko. Diskrezioz beste baliabide batzuk bilatzen jarraituko dugu, harrera aukera gehiago eskaini ahal izateko ”, gaineratu du zinegotziak.

GASTEIZ

Bestalde, Gasteizko beste albiste batzuekin jarraituz, 2025-2026 ikasturte berri honetan, Jose Uruñuela dantza-kontserbatorioa MobPlan izeneko mugikortasun planean, bere “Erasmus” partikularrean, murgilduko da berriro. “Programa honen helburua da ikasleek esperientzia akademiko eta artistiko berriak bizitzea, beste ikastetxe eta lan egiteko modu batzuk ezagutzea, eta dantzaren munduko hainbat erakunderekin sinergiak sortzea”, azaldu du Sonia Díaz de Corcuera Kultura eta Hezkuntza zinegotziak.

Edizio berri honetan 11 ikaslek parte hartuko dute: Lanbide Irakaskuntzetako 5. mailako 7 ikaslek eta 6. mailako 4 ikaslek. Lehen hiruhilekoan dantzako 4 kontserbatorio profesionaletara joango dira: Riba-roja de Túriara, Málagako ‘Pepa Flores’era eta Sevillako ‘Antonio Ruiz Soler’ izenekora, eta Bartzelonako Institut Escola Artístic Oriol Martorellera. Uruñuelako lehenengo 4 ikasleak gaur bertan abiatuko dira.