Udaberria lehorra izan da Kantauri isurialdean eta bustia Mediterraneo isurialdean, eta tenperaturak oso beroak

Martxo, apiril eta maiatzean zehar bilakaera oso ezberdina izan da: martxoa beroa izan da itsasertzean eta normala barnealdean, apirila oso beroa izan da, eta maiatzean, berriz, tenperaturak normaltzen joan dira.

Martxoaren 13tik 17ra bitarteko egunak izan dira udaberriko hotzenak eta egunetik egunera izotza leku gehiagotan egin du; hilaren 17a egunik hotzena izan da eta Mediterraneo isurialde osoan izotza egin du (Subijana -5,5 gradu, Navarrete -5, Kanpezu -4,9 eta Agurain -4,7). Banalerroaren beste aldean neurtutako balioak ere aipatzeko modukoak izan dira (Berastegi -2,8 gradu, Balmaseda -2, Muxika -1,6, Mañaria -1,5 eta Inurritza -0,2).

Tenperatura maximo absolutuak maiatzaren 29tik 31ra bitartean neurtu dira

Tenperatura minimo altuenei dagokienez, maiatzaren 30eko goizaldean neurtu dira, eta goizalde tropikala izan da kostaldeko eta mendialdeko hainbat lekutan, 20 gradutik gorako tenperaturak erregistratuz (Jaizkibel 24 gradu, Matxitxako 23,8, Untzueta 22,1, Oiz 21,5, Cerroja 21,3, Zarautz 20,7, Almike 20,7, La Garbea 20,6 eta Zegama 20,3).

BESTE DATU BATZUK

Tenperatura maximo absolutuak maiatzaren 29tik 31ra bitartean neurtu dira. Horrela, hilaren 29an 32 graduak gainditu dira barnealdeko leku askotan (Albaina 34,6 gradu, Areta 34,6, Galdakao 34,5, Moreda 34,5, Igorre 34,5, Orozko 34,5, Iurreta 34,4 eta Balmaseda 34,4), eta 35 graduak Kantauri mendebaldeko bailaretan (Saratxo 36,1 gradu, Gardea 35,6, Ordunte 35,5, Abusu 35,4, Berna 35,4, Zalla 35,3 eta Jarralta 35,2). Estazio horietako batzuetan maiatzeko tenperatura maximoen errekorra hautsi da.

Tenperatura horiekin batera, intsolazioa normalean baino handiagoa izan da, batez ere Kantauri isurialdean, non %10-20 eguzki ordu gehiago izan diren. Mediterraneo isurialdean eguzki orduen kopurua normalagoa izan da, %4 inguru gehiago. Udaberri osoan, Bilbok 523 eguzki ordu izan ditu, Donostiak 538 eta Gasteizek 527.