Ondasunen esportazioak %20,1 murriztu dira azaroan EAEn

Euskal Autonomia Erkidegoko (EAE) ondasunen esportazioek %20,1 egin dute behera 2024ko azaroan urte arteko tasan, zenbatekoa 2.519 milioi eurokoa izan baita, aurreko urteko hilabete bereko 3.152 milioi euroen aldean. Zehazkiago, energia produktuen esportazioak %83,8 ez-energetikoenak %12,2 jaitsi dira, Eustat euskal estatistika erakundearen datuen arabera.

Araban %8,1 jaitsi dira esportazioak

Lurraldeka, Bizkaia da atzerakadarik handiena izan duena (-%34,0), produktu ez-energetikoen esportazioak (-%15,5) eta, batez ere, energetikoenak (-%84,2) jaitsi direlako. Gipuzkoan esportazioak %13,1 jaitsi dira, eta Araban %8,1.

Alemania, Frantzia, Erresuma Batua, Belgika eta Italia izan dira EAEren bezero nagusiak azaroan, esportazio guztien %48,5 hartuta. Bost herrialde horietatik lau EB-27koak dira, eta eremu horretan biltzen da esportazioaren %61,5.

EAEko ondasunen inportazioek %2,7ko hazkundea izan dute azaroan

Bestalde, EAEko ondasunen inportazioek %2,7ko hazkundea izan dute azaroan, 2.281 milioi eurora iritsiz. Inportazio energetikoak %5,4 murriztu dira, eta ez-energetikoak %5,8 hazi. Lurraldeka, Arabako inportazioek %22,9 egin dute gora, eta Gipuzkoakoek %2,6; Bizkaikoek, aldiz, %3,0 egin dute behera.

Alemaniatik (380,4 milioi), Frantziatik (174,2 milioi), Txinatik (165,4 milioi), Mexikotik (116,0 milioi) eta Italiatik (113,4) egin dira inportazio gehienak azaroan, hurrenkera horretan.

Urteko lehen 11 hilabeteei dagokienez, EAEko esportazioak %5,1 jaitsi dira aurreko urteko aldi beraren aldean, hau da, 1.541 milioi euro gutxiago, eta horrek esan nahi du merkataritza saldoa 1.596 milioi euro murriztu dela aurreko urteko aldi berean erregistratutakoaren aldean.

Beste datu batzuk

Bizkaiko esportazioak izan dira EAEko garrantzitsuenak urtarriletik azarora, 11.094,4 milioi euroko guztizko metatuarekin eta %2,7ko jaitsierarekin. Araban 8.413,6 milioi euro merkaturatu dira, eta %12,2ko murrizketa izan da. Urteko metatuan Gipuzkoak izan du portaerarik onena, %0,8 egin duelako behera eta 9.215,9 milioi euro esportatu direlako.

EAE osorako inportazioen metatua 25.114,9 milioi eurora iritsi da urtarriletik azarora, eta kopuru horren urte arteko alderaketa eginez gero, ikusten da 2023ko aldi berean erregistratutakoa baino 55 milioi euro gehiago dela.