Industriaren negozio zifra %27 eta balio erantsia %15,2 gehitu ziren 2022an EAEn

Faktore kostuko balio erantsi gordinari dagokionez, 16.650 milioi eurokoa izan zen, 2021ean baino %15,2 handiagoa eta, 2008koaren ondoren, historiako bigarren handiena. Adierazle horrek ondasun eta zerbitzuen ekoizpen osoaren balio ekonomikoa neurtzen du, ekoizteko beharrezkoak izan diren baliabideak, diru laguntzak eta zeharkako zergak kenduta.

EAEko industriak 2022an izan zuen indarra adierazle ekonomiko guztietan proiektatu zen. Enpleguan, EAEko industriako landunen kopurua %1,4 igo zen eta orotara 204.774 langile zeuden, 2021ean baino 2.824 gehiago, eta %2,5 ordu gehiago egin zuten lan. Era berean, langile gastuak %6,6 gehitu ziren.

Euskal industria sektoreak 81.308 euroko itxurazko lan produktibitatea erregistratu zuen 2022an enplegatutako pertsona bakoitzeko -produkzio prozesuari aplikatutako lan unitate baten errendimendua-, 2021ekoa baino %13,6 handiagoa, eta lehen aldiz gainditu zen pertsona bakoitzeko 80.000 euroko muga. Langile bakoitzeko kostua 47.911 eurokoa izan zen, aurreko urtean baino %5,1 handiagoa.

Bi adierazleak uztartuz gero, soldaten arabera doitutako lan produktibitatearen ratioa lortzen da; horrek adierazten du zenbat balio erantsi lortzen den langile bakoitzeko, batez besteko kostuak kontuan hartuta. 2022rako bere balioa %169,7koa izan zen, edo bestela esanda, balio erantsiaren terminoetan enplegatutako pertsona bakoitzeko kostuen balioa baino 1,697 aldiz handiagoa lortu zen. Adierazle hori %8 igo zen 2022an aurreko urtearekin alderatuta.

Era berean, inbertsioa 2.520 milioi eurokoa izan zen 2022an, 2009tik izan den inbertsio ekonomikorik indartsuena izanik, eta %39,8 igoz aurreko urtekoaren aldean. Covid-19aren pandemiaren urtean %13,5eko tasa negatiboa izan zen, eta 2021ean %1,2ko susperraldi txikia gertatu zen.