Euskalmet euskal meteorologia agentziaren iragarpenaren arabera, ostiral honetan, apirilaren 19an, giro eguzkitsua eta egonkorra izango da. Zerua, orokorrean, hodei gutxirekin egongo da, ipar isurialdean goizean behe-hodeien tarte hodeitsu batzuekin eta egunsentian lainoguneekin barnealdeko bailaretan. Ekialdeko haizea ibiliko da; arratsaldean ipar-ekialdetik finkatuko da eta tarteka bizi ibiliko da.
Hala, eta ildo horretatik, Euskalmetetik azpimarratu dutenez, tenperatura maximoak igo eta 17-20 gradu artekoak izango dira; minimoak, ordea, jaitsi egingo dira eta baliteke Araba eta Nafarroako zenbait lekutan izotza egitea. Hiriburuetan, Baionan 4 gradu espero dira gutxienez eta 19 gehienez, Bilbon 6 gutxienez eta 19 gehienez, Donostian 4 gutxienez eta 18 gehienez, Gasteizen 0 gutxienez eta 18 gehienez, eta Iruñean 0 gutxienez eta 18 gehienez.
Beste informazio gehigarria
Itsasoan hego-ekialdeko haizea ibiliko da, 3ko indarrarekin, eta arratsaldean ipar-ekialdera egingo du, 2-3koarekin; itsaso kizkurra eragingo du, arratsaldean itsaskirriko guneekin. Ipar-mendebaldeko hondoko itsasoak metro bateko inguruko olatuak altxatuko ditu. Itsasgorak 03:01ean eta 15:27an izango dira, eta itsasbehereak 09:11n eta 21:19an. Uraren tenperatura 14 gradukoa da eta ikuspena hamar kilometrotik gorakoa izango da.
"Giro eguzkitsua eta epela eguerdi inguruan. Zerua, orokorrean, hodei gutxirekin egongo da, ipar isurialdean goizean goiz behe-hodeien tarte hodeitsu batzuekin eta egunsentian lainoguneekin barnealdeko bailaretan. Goizean hodeiak desagertu egingo dira eta arratsaldean zerua ia garbi geratuko da. Ekialdeko haizea ibiliko da; arratsaldean ipar-ekialdetik finkatuko da eta tarteka bizi ibiliko da. Tenperatura maximoak igo egingo dira eta 17-20 ºC artekoak izango dira", azpimarratu dute bertatik.
