Gasteizko Udalak Maria Sarmiento plaza zaharberritzeko lanak esleitu ditu, 763.000 euroan

Gasteizko Udaleko gobernu bilerak Maria Sarmiento plaza zaharberritzeko lanak esleitu ditu ostiral honetan, 763.760 euroko aurrekontuarekin eta sei hilabeteko gauzatze epearekin. Proiektuak Next Generation EU funtsetatik eratorritako Europako finantzaketa jaso du.

Beatriz Artolazabal Gasteizko alkateorde eta Espazio Publikoaren eta Auzoen zinegotziak adierazi du "gorabeherarik ez bada" lanak uda aurretik has daitezkeela. Azaldu duenez, erreformaren helburua da "plazaren estetika hobetzea zoladurak berrituta, altzari berriak eta iturri bat jarrita, eta ureztaketa automatikodun berdegune berriak sortuta".

Zoladurari dagokionez, plazako zoruaren erreforma integrala egitea proiektatu da, gainazal guztia eraistea eta 15 cm-ko lodiera duen material pikortsuarekin betetzea barne. Lan horien arabera, plazaren iparraldeko aldean 20 cm-ko zabalera duen luzetarako ertzeko zerrenda jarriko da, Maria Sarmientoren testuak dituzten inskripzioekin.

Bestalde, espazio horren erdigunean, zoladura mailan hamar zurrustadako iturri apaingarria eta argiduna jartzea aurreikusi da. Iturriak zirkuitu itxiko funtzionamendua izango du eta haren andel nagusia plazaren erdigunetik kanpo egongo da. Txorrotada bakoitzak bere andela eta ponpa izango ditu eta, hala, argien eta zurrusten jolas ezberdinak egin ahal izango dira.

Hiriko altzariei dagokienez, plazaren hegoaldean banku luze bat jarriko da eta, iparraldean, aldiz, bi banku bikoitz. Babesgabetuen plazako bidegorriaren ondoan jarriko dituzte bizikletak aparkatzeko tokiak.

"Esku hartze garrantzitsua da eta erdigunea indartzeko eta eremu horretan merkataritza eta bizitza bultzatzeko dugun estrategiarekin lotuta dago. Hau da, gure helburua da Europako funtsek eskaintzen dizkiguten aukera guztiak baliatuz eta espazio publikoa hobetuz hiriko erdigunea leheneratzea", adierazi du Artolazabalek.