Sarrerak %12,5 igo dira urtarrilean EAEko apartamentu turistikoetan eta %2,6 landetxeetan

Hain zuzen, EAEko apartamentu turistikoek 7.936 sarrera erregistratu dituzte urtarrilean, eta bisitari horiek 37.876 ostatu gau ekarri dituzte, hau da, 2023an baino %6,0 gehiago.

Hala, eta ildo horretatik jarraituz, Eustatek egindako azken txostenaren arabera, Euskal Autonomia Erkidegoko apartamentu turistikoetan urtarrilean izandako sarreren %24,0 eta ostatu gauen %31,3 atzerriko bisitarienak izan dira, eta urtetik urterako %35,0ko eta %21,0ko igoerak izan dituzte, hurrenez hurren.

Halaber, turismo establezimendu horietako batez besteko egonaldia 4,77 egunekoa izan da urtarrilean, hau da, aurreko urteko hilabete berean izandakoa baino txikiagoa, orduan 5,07 egunekoa izan baitzen.

Plazen arabera, EAEko okupazio maila %27,3ra iritsi da apartamentu turistikoetan, eta, beraz, iazko urtarrilekoa baino %1,0 puntu handiagoa izan da. Apartamentuen arabera, berriz, okupazio mailak %0,8 puntuko igoera izan du eta %55,2ra iritsi da.

Lurralde historikoak kontuan hartuta, batez besteko egonaldia 2,50 egunekoa izan da urtarrilean Bizkaiko apartamentu turistikoetan, 15,01 egunekoa Arabakoetan eta 8,23 egunekoa Gipuzkoakoetan.

Landetxeak

Bestalde, EAEko landetxeek 3.797 sarrera zenbatetsi dituzte urtarrilean, eta bisitari horiek 7.882 ostatu gau egin dituzte, hau da, 2023ko hil berean baino %20,4 gutxiago.

Urtarrilean EAEko landetxeetan erregistratutako sarreren %92,1 Espainiako Estatuko bisitarienak izan dira, eta aurreko urteko urtarrilarekin alderatuta %2,6 gehitu dira. Estatuko bisitarien ostatu gauak 7.145 izan dira, iaz baino %20,5 gutxiago.

Establezimendu mota horretako batez besteko egonaldia 2,08 egunekoa izan da urtarrilean EAEn, hau da, 2023ko hil berekoa baino txikiagoa, orduan 2,67 egunekoa izan baitzen. Plazen araberako okupazio mailak %1,2 puntuko jaitsiera izan du urtetik urtera, eta gelen araberakoak, berriz, %2,1 puntukoa. Hortaz, okupazio maila %8,0ra iritsi da plazen arabera neurtuta, eta %9,7ra gelen arabera neurtuta.

"Lurraldeka, sarreren kopuruak urtetik urtera izan duen igoera % 25,4koa izan da Araban eta %17,4koa Bizkaian; Gipuzkoan, berriz, sarreren kopurua %13,6 jaitsi da. Ostatu gauen kasuan, hiru lurraldeek urtetik urterako aldakuntza negatiboak izan dituzte: Gipuzkoan %24,3ko jaitsiera gertatu da (3.688 ostatu gau), Bizkaian %20,1ekoa (2.418 ostatu gau) eta Araban %11,3koa (1.776 ostatu gau)", azpimarratu zuten aipatutako txostenean.

Azkenik, aterpetxe turistikoei dagokienez, 5.483 sarrera eta 11.956 ostatu gau zenbatetsi dituzte urtarrilean, 2023an baino %20,4 eta %14,0 gutxiago, hurrenez hurren. Batez besteko egonaldia 2,18 egunekoa izan da (2,02 egunekoa 2023ko urtarrilean), eta okupazio maila, berriz, %14,6koa, hau da, aurreko urteko hil berean izandakoa baino %4,2 puntu txikiagoa.