EAEko esportazioak %0,3 gehitu dira 2023an, 32.600 milioi eurotik gorakoak izan ondoren

Euskal Autonomia Erkidegoko (EAE) esportazioek 32.645 milioi euroko balioa izan dute 2023an, hau da, aurreko urtean baino % 0,3 gehiago (106,5 milioi euro gehiago). Produktu ez-energetikoek % 3,4ko igoera izan dute, eta produktu energetikoek, berriz, %31,2ko jaitsiera, Eustat euskal estatistika erakundearen datuen arabera.

Inportazioak 26.797 milioi eurokoak izan dira 2023an, hau da, %8,9 jaitsi dira (2.615 milioi euro gutxiago). Inportatutako produktu ez-energetikoak % 4,1 jaitsi dira, eta energetikoak, berriz, % 20,5.

Esportazioen eta inportazioen zenbatekoak kontuan hartuta, EAEko ondasunen kanpo merkataritzak 5.848,4 milioi euroko saldo positiboa izan du 2023an, %121,8ko estaldura tasa positiboarekin.

Lurraldeka, Bizkaiak egin die ekarpenik handiena esportrazioei, 12.388 milioi eurorekin (guztizkoaren %38); ondoren, Araba (10.210 milioi euro) eta Gipuzkoa (10.047 milioi euro) kokatu dira. Arabako esportazioek 868 milioi euroko igoera izan dute urtetik urtera, hau da, %9,3ko igoera termino erlatiboetan; Gipuzkoan, igoera txikiagoa izan da, %1,4koa, hau da, 142 milioi euro gehiago; Bizkaian, berriz, bilakaera negatiboa izan da, 903,5 milioi euro gutxiagorekin, hau da, %6,8ko beherakada.

EAEko esportazioen helmuga herrialdeen zerrendan lehena Alemania izan da (guztizkoaren %15,8), eta ondoren kokatu dira Frantzia (%14,9), AEB (%8,4), Erresuma Batua (%6,3) eta Italia (%5,6). Bost herrialde horiek esportazioen % 51 bildu dituzte, 16.629,7 milioi euroko zenbatekoarekin.

Inportazioak herrialdearen arabera aztertuta ere, lehenengo herrialdea Alemania izan da, 3.970,8 milioi eurorekin (guztizkoaren % 14,8). Atzetik kokatu dira Frantzia (2.143,0 milioi euro, %8,0), Txina (2.104,2 milioi euro, %7,9), AEB (1.804,7 milioi euro, %6,7), Italia (1.326,5 milioi euro, %5,0), Brasil (1.326,1 milioi euro) eta Herbehereak (1.210,9 milioi euro).