Foru Aldundiak Arabako enpresei lagundu die Düsseldorfen talentu bila

Arabako Foru Aldundiak Be Basque Talent Conference jardunaldian parte hartu du asteburu honetan, talentu bila dabiltzan enpresen eta kanpoan bizi den talentuaren (kasu honetan, Alemaniaren) arteko topaketa-jardunaldian. Saray Zárate Ekonomiaren Garapen eta Berrikuntzako diputatuak Arabako hainbat enpresa lagundu ditu, CIC Energigune, Basquevolt eta Tubacex, beren konpainietarako kualifikazio handiko langileak bilatzen.

"Enpresek eta Foru Aldundiak funtsezkotzat jotzen duten estrategia horretan aurrera egiten jarraitzeko aukera ematen digun ekitaldia da, talentua Arabara itzultzea", adierazi du foru ordezkariak, "talentua funtsezkoa da lurraldearen etorkizunerako. Talentua mantentzeko eta erakartzeko ahalegina egin behar da. Eta beharrezkoak dira gure lurraldea talentu-gune bihurtzen lagunduko diguten proiektuak; horregatik, garrantzitsua da Araba Talent bezalako jardunaldi eta programa horiek egotea ".

Egun oso batez, Düsseldorfen bildu dira beren karrera Germaniako hirian eta inguruetan garatzen duten goi-mailako profesionalak, bai eta euskal enpresak, giza baliabideen aholkularitzak eta zentro teknologikoak ere. Ekitaldia Eusko Jaurlaritzako SPRI Taldeak garatutako Basque Talent estrategiaren barruan dago, eta konfiantzazko giro batean harreman profesionalei ekiteko balio du.

Be Basque Talent Conference-k talentua bilatzen duten enpresen eta kanpoan bizi den talentuaren arteko topaguneak sortzea du helburu. Alde batetik, ekitaldira hurbiltzen diren profesionalei Euskal Herriko egoera sozioekonomikoa eta zientifiko-teknologikoa gertutik ezagutzea, lan-merkatuaren joerei buruzko informazioa lortzea eta beren taldeetan talentua txertatu nahi duten erakundeekin biltzea eskaintzen die. Bestalde, goi-mailako gaitasunak eta nazioarteko ezagutza zabala dituzten profesionalak ezagutzeko aukera paregabea ematen die erakunde horiei.

Jardunaldian zehar, profesionalek agenda pertsonalizatua izan dute, eta aukera izan dute enpresen aurkezpenak entzuteko, eztabaida-foro ireki batean ideiak eta iritziak partekatzeko, tailer tematikoetara joateko eta erakundeetako ordezkariekin banakako bilerak egiteko. Gainera, bazkari "networking" pertsonalizatua izan dute, konferentzian parte hartzen duten beste profesional eta erakunde batzuekin harremanetan jartzeko.