Foru Aldundiak ibilgailuak pasatzea eta jarduerak mugatuko ditu marrualdian zehar Gorbeiako Parke Naturalean

Arabako Foru Aldundiak irailaren 4tik urriaren 8ra arte mugatuko du ibilgailuen pasatzea, bai eta erabilerak eta jarduerak ere Gorbeiako Parke Naturaleko oreinen marrualdian, Zuia eta Zigoitia udalerriei eragiten baitie.

Urteetan zehar, eta foru erakundeak hartutako neurri horri esker, emaitza ezin hobeak lortu dira espezie horren kudeaketa planaren barruan, eta, horri esker, espeziea hobetu da eta eremuko kalteak murriztu dira.

Oreinen sakabanatze geografikoa saihesteko eta ugaltzeko aldietan edo marrualdietan hautespen naturalaren alde egiteko helburu bikoitzarekin, beharrezkoa da espeziearentzat kritikoa den aldi horretan zehar ahalik eta gehien murriztea kanpotik datozen nahasmenduak naturagune babestuaren isurialde arabarrean.

Berariaz baimendutako kasuetan izan ezik, hau da, egur, larre, luberritze aprobetxamendu edo ikerketa zientifiko baimenduen kasuan izan ezik, debekatuta egongo da ibilgailuen zirkulazioa. Marrualdian zehar igarotzeko mugak dituzten pistak eta bideak behar bezala seinaleztatuta egongo dira, eta zaldizko ibilbideek eta mendiko bizikletaz egindakoek ere parkeko arduradunen baimena izan beharko dute.

Era berean, perretxikoak eta basafruituak biltzea debekatuta dago aldi horretan, marrualdiaren eremuan, bai eta premiazkoak ez diren basogintza jarduerak ere, hala nola sastrakak kentzea, bakanketak edo mehazketak.

Parkeko kudeaketa organoak muga horien berri eman die dagoeneko udalei, administrazio batzarrei eta eraginpeko ehiza esparruei.

Marrualdia behatu

Arabako Foru Aldundiak gogorarazten du marrualdia ikusi nahi duten pertsonek horretarako gaitutako gune berezietan egin beharko dutela, alegia, entzuteko, behatzeko, argazkiak egin eta filmatzeko behatokietan. Leku horietan, gainera, derrigorrezkoa da zenbait arau betetzea, besteak beste, isilik egotea, ez mugitzea, oreinengana ez hurbiltzea edo linternak, fokuak eta flashak ez erabiltzea. 

Irudiak bidexketatik kanpo grabatzeko jarduerek Parke Naturalaren berariazko baimena izan beharko dute. Baimen horrek lekuak, ordutegiak eta portaera arauak zehaztuko ditu.

Marrualdi sektorearen mugaketa:

Iparraldean: Arabaren eta Bizkaiaren arteko banalerroa, Arraldeko Haitzetatik (Zuia) eta Leizarandatik (Zigoitia).

Ekialdean: Murua herritik ”Leizaranda” dermioraino, Gorbeiako harrobietara doan pista eta hortik aurrera.

Hegoaldean: A-3610 errepidearen eta Gasteiz-Altube N-622 autobiaren gainean dauden Gorbeiako baso masen behealdeko bazterra, honako herri hauen lurretan: Murua, Manurga, Zarate, Aretxaga, Markina eta Sarria.

Mendebaldean: Baia ibaiarekin paralelo doan pista, Sarria herritik ”Arraldeko haitzak” dermioraino.