Nerea Melgosa sailburuak zuzentzen duen Berdintasun, Justizia eta Gizarte Politiketako sailak helburu argi bat dauka: aurrera egiten jarraitzea, pertsona ezinduek ere justizia eskuragarriago izan dezaten.
Hala, sailburuak aste honetan bertan inauguratu du Pertsona, Enpresa eta Teknologia ikastaroa, UPV/EHUko Udako Ikastaroak Fundazioak eta Notariotzaren Kontseilu Nagusiak antolatua. Bere hitzaldian, Melgosak nabarmendu du notariotzak esparru juridikoan duen funtsezko zeregina, “pertsonen borondatearen autonomia eta oinarrizko eskubideak bermatuz”.
Melgosak 8/2021 Legearen erreformaren garrantzia azpimarratu du, ezgaitasuna duten pertsonei beren gaitasun juridikoa erabiltzen laguntzeko. “Ezgaitasuna duten pertsonen tratamenduari beste ikuspegi bat ematen dio, gaitasun juridikoa baldintza berdinetan onartzen baitu eta erabakiak hartzen laguntzen baitu”.
“Oso aldaketa handia da profesionalentzat, pertsonentzat eta haien familientzat. Prestakuntza eta pentsamolde soziala ere behar dira”, adierazi du Melgosak.
11/2023 Legeak sartutako berrikuntza teknologikoak ere landuko dira ikastaroan, notario-digitalizazioari dagokionez, hala nola sozietateak eratzeko eskritura publikoak on line egitea edo dokumentu publikoen zirkulazio elektronikoa.
Arlo honetan, azarotik aurrera, zenbait egintza edo negozio juridiko bideokonferentzia bidez eman eta baimendu ahal izango dira, notarioaren aurrean agertu beharrik gabe. Sailburuaren hitzetan, “mundu juridikoa gero eta teknologikoagoa den gizarte batera egokitzeko urrats erraldoia da”.
