Jarduera fisikoa egiten hasteko M Proiektua egingo da Zarauzko Emakumearen Etxea irailetik aurrera, egun kirolik egiten ez duten emakumeei zuzendua. Ekimena Gipuzkoako Foru Aldundiko Kultura eta Kirol Sailak sustatu du, Zarauzko Udalarekin lankidetzan.
Goizane Alvarez Gipuzkoako Aldundiko Kultura eta Kirol diputatuak, Gloria Vazquez Zarauzko Parekidetasuneko eta Eraztun Berde Urdineko zinegotziak eta Inaxio Illarramendi Kiroleko, Ingurumeneko eta Animalien Ongizateko zinegotziak aurkeztu dute programa astelehen honetan Zarauzko Emakumearen Etxean bertan.
Azaldu dutenez, M Proiektua M mugimendua: Emakumeok Mugimenduan estrategian kokatzen da; estrategia horren helburua da emakumeek jarduera fisikoan parte har dezaten sustatzea, bizi ohitura osasungarriak sustatzea eta ariketaren bidez emakume aktiboen komunitatea sortzea.
Bada, Irunen egindako lehen esperientziaren ondoren, Zarautz izango da M proiektua abian jarriko duen Gipuzkoako bigarren udalerria. Kultura eta Kirol Sailaren helburua da eredua ebaluatzea eta finkatzea, pixkanaka lurraldeko beste udalerri batzuetara hedatzeko.
Jarduera fisiko gutxi egiten duten eta hainbat arrazoirengatik kirol instalazioetara joaten ez diren edo jarduera antolatuetan parte hartzen ez duten emakumeei zuzenduta dago bereziki. Helburu nagusia da ohiturak pixkanaka aldatzea, espazio seguru, neutro eta egokitua eskainiz, parte hartzaileak ariketa egiten has daitezen, beldurrak edo segurtasun ezak gaindi ditzaten, horrela ongizate fisiko eta emozionala hobetzeko.
Parte hartzaileak jarduera fisikoaren mailaren arabera hautatuko dira, IPAQ nazioarteko eredua erreferentziatzat hartuta eta Jarduera Fisikoaren Orientazio Zerbitzuaren laguntzarekin. Zerbitzu hori arduratuko da emakume interesdunak erakartzeaz eta baloratzeaz.
Programa hiru fasetan burutuko da: erakartzea eta hautatzea, hau da, programaren onuradun izan daitezkeen emakume ez-aktiboak aurkitzea eta laguntzea; aktibazioa edo jarduera fisikoa egiten hastea espazio seguru batean, profesional espezializatu batekin eta talde txikietan; deribazioa, hau da, udalerriko klub, instalazio, elkarte edo bestelako kirol baliabideetara pasatzeko prozesua erraztea, parte hartzaileek beren jarduerari modu autonomoan eutsi ahal izan diezaioten.
Horrela, Emakumearen Etxea izango da erreferentziako espazioa hasierako fasean, eta ondoren, parte hartzaileei kirola egiteko ohiko espazioetarantz lagunduko zaie, programan zehar sortutako loturak eta laguntza taldeak manten ditzaten.
2027KO MAIATZERA ARTE
M Proiektua datorren irailean hasiko da eta 2027ko maiatzera arte luzatuko da. Bi talde izango ditu, bakoitza gehienez 12 parte-hartzailerekin. Astean bi saio eskainiko dira, eta parte hartzaile bakoitzak saio batera joan beharko du: asteartean 10:00etan eta ostegunean 17:00etan.
Zarauzko Emakumearen Etxean egingo dira saioak, eta Maddi Sukuntza jarduera fisikoan espezializatutako monitoreak zuzenduko ditu. Jarduerak parte hartzaileen baldintzetara eta beharretara egokituko dira, ariketa fisikoan pixkanaka, modu seguruan eta atseginean hasten laguntzeko.
Interesa duten emakumeek uztailaren 1etik 31ra bitartean eman dezakete izena aurrez aurre Emakumearen Etxean, telefonoz, WhatsApp bidez edo posta elektronikoz.
