Galdakaoko Elexaldeko igerilekuak irailaren 30era arte egongo dira irekita udako ordutegiarekin

Galdakaoko Udalak (Bizkaia) Elexaldeko igerilekuen udako denboraldia jarri du martxan eta irailaren 30era arte egongo da indarrean. Horrela, udal instalazioek etenik gabeko zerbitzua eskainiko dute datozen lau hilabeteetan, asteburu eta jaiegunak barne.

Hain zuzen, Galdakaoko Udaletik jakinarazi dutenez, ekainaren 1etik 14ra eta irailaren 16tik 30era, astelehenetik ostiralera 15:00etatik 20:00etara eta asteburuetan 11:00etatik 20:00etara egongo dira zabalik igerilekuak, eta ekainaren 15etik irailaren 15era, aldiz, astelehenetik igandera 11:00etatik 20:00etara.

Igerilekuetako jarduera guztiak itxiera ordua baino 15 minutu lehenago amaituko dira, erabiltzaileen segurtasuna eta antolaketa egokia bermatzeko. Prezioei dagokienez, abonatuek eta 4 urtetik beherakoek doako sarrera izango dute; abonurik ez dutenek, berriz, 5 euro ordaindu beharko dute egun osoko sarreran 4 eta 16 urte bitarte badute, eta 7,50 euro 17 urte baino gehiago dutenek. Horrez gain, udako abonua eskuratzeko aukera ere badago: familiarra 64,90 eurokoa izango da, banakakoa 46,90 eurokoa eta 25 urtetik beherakoek 36,10 euroren truke eskuratu ahal izango dute.

Gainera, herritarrek Elexaldeko igerilekuez gozatzeko aukera izan dezaten, hobariak eskatzeko aukera izango dute; diru sarreren arabera emango dira eta informazio gehiago eskuratzeko zein eskaerak egiteko ESAN herritarren arreta bulegora edo udal egoitza elektronikora jo daiteke.

Ohi den bezala, udako igerilekuen egitarauaren baitan, ur puzgarrien zirkuitu berezia jarriko da uztailaren 16an, herriko txikiei zuzenduta. Eguraldiaren arabera, data alda daiteke; horrela izatekotan, udal komunikazio kanalen bidez emango da horren berri.