Nekazaritzako elikadurari eta ekonomia urdinari buruzko aliantza estrategikoa sinatu dute Tecnaliak eta Aztik

Basque Research & Technology Alliance (BRTA) sareko kideak diren Tecnalia eta Azti zentro teknologikoek ibilbide luzeko aliantza estrategiko bat sinatu dute aste honetan Food4Future azokan, nekazaritzako elikagaien industriaren eta ekonomia urdinaren erronkei elkarrekin erantzuteko.

Hala, eta ildo horretatik jarraituz, Tecnaliako zuzendari nagusi Jesus Valerok eta Aztiko zuzendari nagusi Rogelio Pozok sinatu dute hitzarmena, eta, haren bidez, elikaduraren eta ekonomia urdinaren balio kate osorako plataforma komun batean gaitasun zientifikoak eta baliabide teknologikoak optimizatzeko konpromisoa hartu dute. "Hitzarmenak onura nabarmenak ekarriko dizkie enpresei, kontsumitzaileei, gizarteari eta ingurune naturalari", nabarmendu dute sinatzaileek.

Hain zuzen, hitzarmenak zenbait gaitasun osagarri uztartzen ditu: batetik, industriaren digitalizazioa, adimen artifiziala eta bioteknologia (Tecnalia), eta, bestetik, elikadura sistema jasangarriak, 'blue food' eta bioekonomia (Azti). Halaber, akordioak aurreikusten du baterako negozio unitate bat sortzea teknologia merkatura azkarrago transferitzeko.

Aliantzak Proiektu Estrategikoaren parte da akordio berria, zeina 2026ko Kudeaketa Planaren eta Azti2030en oinarrietako bat baita, baita Tecnaliaren eta Aztiren plan estrategikoena ere. Gainera, Euskadiko Gastronomia eta Elikaduraren Plan Estrategikoa 2030ek (PEGA2030) dituen helburuekin lerrokatzen da berrikuntza teknologikoari, nazioarteko hedapenari eta enpresen arteko lankidetzari dagokionez.