Artzain Eskolak ikasturtea bukatu du eta ikastaro trinkoa amaitu duten 12 ikasleek makilak eta diplomak jaso dituzte

Artzain Eskolaren ikasturte amaierako ekitaldia egin da Arantzazuko (Gipuzkoa) Gomiztegi baserrian ostegun honetan, apirilaren 16an, eta, ohi bezala, esnetarako ardi eta ahuntzen ikastaro trinkoa amaitu duten 12 ikasleei makilak eta diplomak eman zaizkie. Aurreko urteetan baino ikasle gehiago izan da, eta ikasle gazteak izan direla eta emakume kopuruak gora egin duela nabarmendu dute Eusko Jaurlaritzatik.

Amaia Barredo Elikadura, Landa Garapena, Nekazaritza eta Arrantzako sailburua zazpi hilabeteko formakuntzaren amaierako ekitaldian izan da, eta nabarmendu du Artzain Eskola "ikasteko gune bizia" dela, non artzaintza "esperientziatik" ulertzen den, "jarduerarekin zuzeneko harremana izatetik".

Gazteei ere zuzendu zaie: "Zuek bezalako jendea behar dugu, prestakuntza, ilusioa eta ikuspegi berritzailea duten pertsonak, artzaintzak etorkizuneko jarduera izaten jarraituko duela bermatuko dutenak. Sektore lehiakorra da, aintzatetsia, enplegua, aberastasuna eta ongizatea sortzeko gai dena gure landa guneetan".

Sailburuak zorionak eman dizkie ikasleei, "etorkizuna duen lanbide bat aukeratzeagatik ez ezik, bizimodu bat ere aukeratu dutelako". Aurtengo ikasturtean 12 ikaslek amaitu dituzte ikasketak, eta Arantzazuko Gomiztegi baserrian 29 urteotan prestatu diren 300 ikasle baino gehiagoko taldean sartu dira.

Artzain Eskolan formakuntza zikloa amaitu duten 12 ikasleetatik zortzi mutilak eta lau neskak. Gainera, 11 ikasle 30 urtetik beherakoak izan dira, eta ikasleen batez besteko adina jaitsi egin da ikasturte honetan. Ikastaroan 15 irakasle aritu dira prestakuntza teorikoan, eta 24 praktikoan. Baserrietara 25 ikustaldi ere egin dira eta, besteak beste, Iparraldeko artzain eskolarekin trukea egin da.