Renfek Donostiako Udalari adierazi dio Herrerako geltokiko igogailua martxan jartzeko lanak aurreikusitakoaren arabera egiten ari direla eta, gutxi gorabehera, bi hilabeteko epean jarri ahal izango dela martxan, hau da, uda aurretik. Edonola ere, esku hartzea igogailua konpontze hutsetik harago doa, eta estazioaren inguruan dauden akatsak hobetzeko eta konpontzeko hainbat jarduketa barne hartzen ditu, horietako batzuk dagoeneko eginak, Donostiako Udaletik jakinarazi dutenez.
Lanak Herrerako geltokiari lotutako erabilera publikoko elementuak Donostiako Udalari laga aurreko prozesuaren barruan sartzen dira. Igogailua konpondu eta doitzeaz gain, eskaileretan, pasabideetan, argiztapen elementuetan, estalduretan eta barandetan konponketak egiten ari da Renfe, bai eta udal langileek eta trenbide operadoreak elkarrekin egindako bisita teknikoan antzemandako hainbat kalte zuzentzen ere.
Igogailuari dagokionez, kalte bandalikoak konpontzeaz eta derrigorrezko berrikuspen teknikoaz gain, doikuntzak egingo dira lotutako instalazioetan, segurtasun sistemetan eta etorkizunean behar bezala mantentzeko behar diren elementuetan.
Lanak amaitu ondoren, Donostiako Udalak instalazioen funtzionamendu egokia egiaztatuko du lagapena formalizatu aurretik, eta une horretatik aurrera, erabilera publikoko elementuen kontserbazioaz, mantentze lanez eta funtzionamenduaz arduratuko da; trenbide administratzaileak, berriz, egiturazko eta trenbide azpiegituretako erantzukizunak bere gain hartzen jarraituko du.
Era horretan, Donostiako Udaletik nabarmendu dutenez, Herrera auzoko bizilagunentzat "bereziki zaila izan den aldi bat" amaituko da, azken hilabeteetan ez dutelako izan irisgarritasunerako funtsezko elementurik. Instalazio guztien gaineko jarduketa zabalago horrekin, nabarmen hobetuko dira geltokiaren inguruko segurtasun baldintzak, irisgarritasuna eta eguneroko erabilera.
