Iurretako Udalak 1,7 milioi euro inbertituko ditu Maiztegi Herri Eskolako patioa osorik eraldatzeko

Iurretako (Bizkaia) Udalbatzak aho batez onartu du Maiztegi Herri Eskolako patioa osorik eraldatzeko proiektua, "espazio hezitzaileagoa, inklusiboagoa, naturalagoa eta ikasleen egungo beharretara egokitua" izan dadin. Lanak hiru fasetan garatuko dira eta 1.741.829,64 euroko aurrekontua izango da; lehenengo faserako %60ko diru laguntza eskatu zaio Eusko Jaurlaritzari, 731.636,30 euroko inbertsioari aurre egiteko.

Proiektua hezkuntza komunitatearekin modu parte hartzailean garatu da, eta jolastokiaren kontzeptu tradizionaletik haratago joatea du helburu, Iurretako Udaleko iturriek prentsa ohar bidez jakinarazi dutenez.

Hain zuzen, Oskar Koka Iurretako alkatearen hitzetan, "oso proiektu garrantzitsua eta polita da udalerriarentzat. Hala ere, behin baino gehiagotan esan dugun bezala, Jaurlaritzaren diru laguntza behar dugu hori gauzatzeko. Herrian behar asko dago eta guztiak hartu behar dira kontuan".

Jarduketaren barruan, Haur Hezkuntzako gunean eta ikastetxearen sarrerarako ibilbidean estalkiak eraikiko dira, espazio horiek euri egunetan ere erabili ahal izateko. Horrez gain, eserlekuak eta eremuak jarriko dira, lurrean bertan integratuta, atsedenerako nahiz hezkuntza jardueretarako pentsatuta.

Beraz, proiektuaren bidez, ikastetxearen kanpoko espazioa berrantolatu ahal izango da, jolas librea, bizikidetza, berdintasuna eta naturarekiko harremana sustatzeko. Gainera, aurreikusitako esku hartze nagusien artean berdeguneak sortzea dago. Hori guztia "ikaskuntza, ongizatea eta inklusioa indartzen dituen ikuspegi pedagogikoarekin egingo da".

Proiektua hezkuntza tresna gisa ere planteatzen da, jolastoki berria ikastetxearen beste baliabide bat bezala erabiltzeko pentsatuta egongo baita, metodologia aktiboak eta ikasleen garapen integrala bultzatuz. Aurreikuspenen arabera, ikasturtea amaitu ondoren hasiko dira lanak, Eusko Jaurlaritzak proiektua finantzatzeko emandako laguntzaren baldintzapean.

"Beti erakutsi dugu konpromiso sendoa proiektu hau aurrera eramateko, herritar guztiei mesede egingo baitie; izan ere, udal instalazioa denez, Iurretak espazio berri bat izango luke haurren gozamenerako", azpimarratu du Oskar Kokak.