Delitu beragatik behin baino gehiagotan atxilotutako 964 pertsona izan dira 2025ean EAEn

Ertzaintzak delitu beragatik behin baino gehiagotan atxilotutako 964 pertsona zenbatu zituen joan den urtean, hau da, 2024an baino 114 gehiago, Eusko Jaurlaritzako Segurtasun Sailetik jakinarazi dutenez.

Delitu beragatik behin baino gehiagotan atxilotutako pertsonen artean gehien errepikatu diren delituak ondarearen eta ordena sozioekonomikoaren aurkakoak izan dira, 212 pertsona atxilotu baitituzten 2025ean delitu hori behin baino gehiagotan egiteagatik.

Delitu horien artean, gauzetan indarra erabiliz egindako lapurretak dira gehien errepikatu direnak, 95 pertsona atxilotu baitituzte arrazoi horregatik; ondoren, indarkeriaz eta larderiaz egindako lapurretak daude, 65 atxiloturekin.

Lurraldeka eta hiriburuka, 545 pertsona atxilotu dituzte Bizkaian delitu bera behin baino gehiagotan egiteagatik, horietatik 263 Bilbon; Gipuzkoan 301 atxilotu izan dira, horietatik 110 Donostian, eta Araban 118, horietatik 103 Gasteizen.

BESTE ALBISTE BATZUK

Bestalde, Ertzaintzarekin jarraituz, Ertzaintzak 36 urteko gizonezko bat atxilotu zuen igandean Gasteizen, kaletik oinez zihoan emakume bati sakelako telefonoa lapurtzea leporatuta. Zerbitzutik kanpo zegoen ertzain bat ohartu zen biktima laguntza eskatzen ari zela, eta berehala atxiki zuen lapurra eta emakumearen telefonoa berreskuratu.

Eusko Jaurlaritzako Segurtasun Sailak jakinarazi duenez, igandeko 19:30 aldera, zerbitzutik kanpo zegoen ertzain batek emakume baten oihuak entzun zituen Gasteizko Errege Atea kalean. Sakelako telefono bat aipatzen zuen emakumeak, eta bere aurretik oinez zihoan pertsona bat seinalatu.

Horren aurrean, eta gertatutakoa argitzeko, agenteak gizona harrapatu zuen eta ertzaina zela esanez identifikatu zen. Emakumeak, bien parera iritsi zenean, agenteari esan zion gizonak poltsan zeraman gama altuko sakelako telefonora lapurtu berri ziola.

Gizonak biktimaren telefonoa zeukala egiaztatu ondoren, agenteak Ertzaintzaren patruila bat agertzeko eskatu zuen eta une batean ihes egiten saiatu zen lapurra atxiki zuen. Ondoren, lapurtutako telefonoa jabeari utzi zioten.

36 urteko gizona ebasketa delitua leporatuta atxilotu eta polizia egoitzara eraman zuten beharrezko eginbideak betetzera. Horiek amaitu ondoren, agintari judizialaren eskuetan jarriko dute.