Gasteizko Montehermoso Kulturguneak sei kontzertu antolatu ditu 2026ko Klaustro Sounds zikloaren baitan, eta tartean izango dira Joseba Irazoki, Alondra Bentley, Raul Lomas eta Oriol Pares, besteak beste.

Sonia Diaz de Corcuera Gasteizko Udaleko Kultura eta Hezkuntza zinegotziak adierazi duenez, "aurreko edizioetan bezala, Klaustro Soundsek soinu esperientzia berritzaileak eta esperimentalak igoko ditu oholtzara, bertako artisten proposamenak nazioartekoagoak diren beste batzuekin konbinatuz".

"Giro intimoan, esperientzia partekatua sortzea da asmoa, artisten, espazioaren eta publiko oso txiki baten arteko lotura zuzena bermatzeko", azaldu du zinegotziak.

Aurtengo programako lehen emanaldia urtarrilaren 18an izango da, Joseba Irazoki Berako (Nafarroa) musikariarekin. Kontzertu "oso berezia" prestatu du 'Gitarra Lekeitikoak (Onomatopeikoa II)' bere azken lanaren aurkezpen birari amaiera emateko. Horretarako, adiskide batzuk gonbidatu ditu, Felix Buff (bateria), Amorante (tronpeta, harmoniuma), K lepo (elektronika) eta Lutxo Neira (kontrabaxua) musikariek osatutako taldea osatzeko.

Bigarren saioa otsailaren 20an izango da, Izarne Oyarzabal dantzariaren eta Garazi Gorostiaga musikagile eta musika ekoizlearen eskutik. 'Aintzira' proiektua aurkeztuko dute; bertan, "iluntasuna, sekretuen eta intimitateen lekua aztertuko dituzte", gorputzaren eta soinu paisaien bidez, drone soinuekin, soinu industrialekin, metal soinuekin eta 'ambient' soinuekin.

BESTE DATU BATZUK

Martxoaren 15ean Alondra Bentley abeslaria iritsiko da Montehermosora, eta, Erika Lopez teklatu-jotzailearekin batera, 'La materia' diskoko abestiak joko ditu. Alondraren musika folkaren, poparen eta indiearen artean dabil, "publiko zabalaren emozioekin bat eginez".

Udaren ondoren, urriaren 4an, Raul Lomas bertako musikari eta artista ariko da, Periko Raezekin batera, eta "ziklorako propio sortutako soinu proiektu intimo eta sentsorialarekin harrituta utziko dituzte bertaratzen direnak".

Azaroaren 22an, Gasteizen bizi den Oriol Pares musikari-ikertzaile kataluniarrak 'Time' pieza interpretatuko du, Jaime De Los Riosekin batera, "transmutazio prozesuetan eta kaosaren teorian inspiratua".

Klaustro Sounds zikloa amaitzeko, abenduaren 13an, Garazi Navas akordeoi jotzailea eta Tunipanea artista ariko dira, eta, akordeoiaren eta automaten bidez, "komunikatzeko eta ulertzeko duten moduarekin harrituta utziko dute publikoa".

Zikloko lehenengo hiru emanaldietarako sarrerak ostiralean jarriko dira salgai, urtarrilaren 9an, eta hurrengo hiruretarakoak irailaren 1etik aurrera, Montehermoso Kulturgunearen webgunean. Bosna euro balioko dute.