EKPk entzute prozesu parte hartzailea abiatuko du urrian kirol portuetako amarralekuen araudia berritzeko

Euskadiko Kirol Portuak (EKP) erakunde publikoak entzute prozesu parte hartzaile bat jarriko du martxan urrian, Eusko Jaurlaritzak berrikusi eta eguneratu nahi duen 2017ko urriaren 19ko Aginduaren inguruan. Agindu horrek arautzen du laketontzien titularrei amarralekuak emateko prozedura eta horiek erabiltzeko emakiden araubidea.

EKPko iturriek jakinarazi dutenez, helburua interes taldeei entzutea da, alegia, kirol portuetako amarralekuen erabiltzaileei eta amarralekua lortzeko itxaron zerrendetan dauden pertsonei, beren ikuspegiak, beharrak eta proposamenak jaso eta Jaurlaritzako organo eskudunari bidaltzeko, araudiaren berrikuspen prozesuan kontuan har ditzan.

Portuetako agintaritzen esanetan, "entzute prozesu honek aukera emango du erabaki inklusiboago, oinarrituago eta legitimoagoak hartzen. Herritarren parte hartzea funtsezkoa da portuen kudeaketa eta araudiaren eguneratzea errealitateari hobeto egokitzeko".

Entzute saioak urriko larunbatetan egingo dira eta Maraka enpresak dinamizatuko ditu, metodologia parte hartzaileen bidez. Lehenengo saioa urriaren 4an izango da Gipuzkoako erabiltzaileekin Orioko Arraun Etxean, eta bigarrena urriaren 11n Bizkaikoekin Gernikako Elkartegian. Ondoren, urriaren 18an itxaron zerrendetan dauden pertsonen txanda izango da Gipuzkoan, Orioko Arraun Etxean berriro, eta urriaren 25ean Bizkaian, Gernikako Elkartegian.

Gainera, parte hartzaileen interesa handia bada eta talde bakoitzeko 50 lagunen muga gainditzen bada, azaroaren lehen hamabostaldian saio gehigarriak egingo dira bi lurraldeetan.

ESKARIAK

Jaurlaritzak kudeatzen dituen kirol portuetan amarraleku kopurua mugatua da egun, gutxi gorabehera 4.000 inguru; eskariak, aldiz, 6.000 baino gehiago dira. "Desoreka horrek argi uzten du espazioak eta baliabideak mugatuak direla, eta horrek kudeaketarako erronka garrantzitsua dakarrela", adierazi dute.

Horregatik, araudiaren berrikuspen prozesuak "ezinbesteko du eskaintza eta eskaria modu orekatuan eta bidezkoan bateratzeko ikuspegiak jasotzea". "Jaurlaritzak argi du herritarren eta eragileen parte hartzea funtsezkoa dela irtenbideak adosteko, gardentasuna bermatzeko eta portuen erabilera ahalik eta justuena egiteko", gaineratu dute.

Guztira, 16 kirol portu daude euskal kostaldean: Hondarribia, Molla-Hondarribia, Donostia, Orio, Getaria, Zumaia, Deba eta Mutriku Gipuzkoan, eta Ondarroa, Lekeitio, Elantxobe, Ea, Mundaka, Bermeo, Armintza eta Plentzia Bizkaian.