Larrialdiko familia behar duten Gipuzkoak 0 eta 6 urte bitarteko 28 haur daude gaur egun Gipuzkoan, Maite Peña Aldundiko Zainketa eta Gizarte Politiketako diputatuak, Maitane Carcamo Familia Harrerako eta Adopzioko atalburuak eta Lucia Saiz larrialdiko harrera familia bateko ordezkariak parte hartu dute prentsaurrekoan iragarri dutenez.

Peñak nabarmendu du familia harrerak funtsezkoak direla adingabe horien ongizatea bermatzeko, eta gogorarazi du, larrialdiko kasuez gain, gaur egun Gipuzkoan 85 haur eta nerabe daudela familia baten beharrean. Guztira, foru erakundeak 885 adingabe tutoretzen ditu; horietatik 556 zentroetan bizi dira eta 329 harrera familiekin daude.

"Harrera familiak Gipuzkoako balio onenen eredu dira: etxeko ateak irekitzen dizkiete behar duten haur eta nerabeei. Komunitate solidario eta arduratsua gara, pertsona ahulenak babesteko antolatzen dena. Haurren ongizatea bermatzea da gure lehentasuna", esan du.

Peñak gogorarazi du borondatezko familia harrerak aldi baterako edo mugarik gabeko etxea eskaintzen diela arrisku edo babesgabetasun egoeren ondorioz jatorrizko familiarekin bizi ezin diren haur eta nerabeei

Ildo horretan, foru diputatuak bereziki eskertu du programan parte hartzen duten familien lana: "Ez da beti erraza: erronkak, zalantzak eta beldurrak daude, baina baita ilusio, ausardia, maitasun eta konpromiso handia ere. Honek guztiak ezin hobeto definitzen du harrera familia izateak esan nahi duena".

ALDI BATERAKO EDO MUGARIK GABE

Peñak gogorarazi du borondatezko familia harrerak aldi baterako edo mugarik gabeko etxea eskaintzen diela arrisku edo babesgabetasun egoeren ondorioz jatorrizko familiarekin bizi ezin diren haur eta nerabeei.

Hiru harrera modalitate daude: larrialdikoa, gehienez sei hilabeteko iraupenarekin, berehalako ebaluazioa behar duten egoeretara zuzendua; aldi baterakoa, bi urtera artekoa, jatorrizko familiak sendatzeko aukera duten adingabeentzat; iraunkorra, epe laburrean itzulerarik aurreikusten ez denean. Adin nagusitasunera iristean, elkarbizitzak aurrera egin dezake bi aldeek hala nahi badute, helduarorako trantsizioan lagunduta.