Euskal Autonomia Erkidegoko (EAE) 1.720 ikasle aurkeztuko dira aste honetan Unibertsitatera Sartzeko Ebaluazioaren ezohiko deialdira Euskal Herriko Unibertsitatean (EHU), iaz 1.535 izan ziren bitartean; beraz, %12,5 igo da aurten matrikulazio kopurua.
Hain zuzen, EHUko iturriek jakinarazi dutenez, Batxilergoko 1.201 ikasle eta Lanbide Heziketako goi mailako heziketa ziklo bat egin duten beste 91 matrikulatu dira; gainera, 428 ikasle emaitza hobetzera aurkeztuko dira. Azterketak asteazkenetik ostiralera egingo dira, uztailaren 3tik 5era, EHUko hiru campusetan.
Unibertsitatera Sartzeko Ebaluazioak bi fase ditu: sarbidea eta onarpena. Sarbide fasearen helburua da ikasleen heldutasuna eta oinarrizko trebetasunak neurtzea graduko unibertsitate ikasketa ofizialak egiteko, eta bost azterketek osatzen dute: Gaztelania eta literatura; Euskara eta literatura; Espainiako historia ala Filosofiaren historia (ikasleek bietatik bat aukera dezakete); Lehenengo atzerriko hizkuntza; Batxilergoko 2. mailako modalitateko derrigorrezko gaia. Gai bakoitzak 0 eta 10 bitarteko nota jasoko du, eta fase honetan gehienez 10 atera daiteke.
Batxilergoko notaren eta fase orokorreko kalifikazioaren artean egindako batez besteko nota haztatuan 5 puntu edo gehiago lortuz gero proba gainditutzat joko da, baldin eta ikasleak fase orokorrean gutxienez 4 puntu lortu baditu (%60 Batxilergoari edo Heziketa Zikloari dagokio eta % 40 fase orokorrari).
Bestalde, onarpen fasea borondatezkoa da. Ikasleak edozein irakasgai aukeratu ahal du Batxilergoko bigarren mailako enborreko aukerazko irakasgaien artean, gehienez, lau. Nota igotzeko ere balio ahal dute sarbide fasean egindako irakasgaietako batzuek. Azterketei dagokienez, pandemian sortutako egitura malgua mantendu da. Proben emaitzak uztailaren 10ean argitaratuko dira, 12:00etan.
