Ezkontzen kopuruak areagotu egin dira Euskadin

Gero eta bikote gehiagok erabakitzen dute Euskal Autonomia Erkidegoan ezkontzea, edo, behintzat, halaxe islatzen dute Eustat Euskal Estatistika Erakundeak egindako datuek.

Hala, eta ildo horretatik jarraituz, , 2022ko laugarren hiruhilekoan 1.634 ezkontza izan ziren Euskal AEn, hau da, aurreko urteko hiruhileko berean baino % 3,1 gehiago. Gipuzkoan % 14,2 (556) eta Bizkaian % 1,3 (779) gehitu zen inskribatutako ezkontzen kopurua; Araban, aldiz, % 14,2 murriztu zen (199). Bestalde, 100 ezkontza zeinetan gutxienez ezkontideetako bat egoiliarra baitzen Euskal AEtik kanpo inskribatu ziren. Ezkontza guztietatik 1.578 ezkontza heterosexualak izan ziren, eta 56 sexu bereko pertsonen artekoak, 36 emakumeen artekoak eta 20 gizonen artekoak.

2022ko laugarren hiruhilekoko 1.634 ezkontzetan, bizilekua Euskal AEn zuten 1.537 emakume eta 1.507 gizon ezkondu ziren. 1.254 emazterentzat (% 81,6) hori izan zen lehendabiziko ezkontza, alargunak 8 izan ziren, eta dibortziatuak 275. Senarrei dagokienez, 1.198rentzat (% 79,5) hori izan zen lehendabiziko ezkontza, eta 10 alargun eta 299 dibortziatu berriz ezkondu ziren.

Ezkontideen adinaren araberako banaketari dagokionez, emazteen % 84,6k eta senarren % 92,3k 30 urte baino gehiago zituzten. 2021eko aldi berean, ehuneko hori % 84,5 izan zen emakumeen artean eta % 91,4 gizonen artean.

2022ko laugarren hiruhilekoan, emakume ezkonberrien % 23,2k eta gizon ezkonberrien % 16,3k atzerriko nazionalitatea zuten. Aurreko urteko hiruhileko berarekin alderatuta, emakumeen artean 0,4 igo da, eta gizonen artean ehuneko 0,1 puntu jaitsi da.