Osakidetzan artatutako Gazako bi urteko haurra egoera kliniko egonkorrean dago, lehen balorazioen ondoren

Gazako Zerrendatik asteazkenean familiarekin batera iritsitako bi urteko haurraren lehen balorazio medikoa egin dute Gasteizko Txagorritxu ospitalean, eta talde medikoko arduradunek adierazi dute pazientea egoera kliniko egonkorrean dagoela.

Adingabea Oftalmologia atalak baloratu du, eta ostiralean Pediatriak eta Anestesiologiak ere ebaluatuko dute. Zerbitzu horiek guztiek definituko dute asistentzia planik egokiena, Osakidetzatik jakinarazi dutenez.

Ricardo Cocco Osakidetzako oftalmologoak Arabako ESIan azaldu duenez, pazienteak "sortzetiko begi patologia du, eta ikusmen gaitasunari eragiten dio. Egindako lehen proben ondoren, positiboki baloratzen dugu pronostikoa hobetzeko esku hartzeko aukera".

Bestalde, Conchi Salado pediatrak adierazi du balorazio oso bat egingo diotela bere osasun egoera eta nutrizio egoera aztertuz, haurraren txertaketa egutegia baloratuko dutela, eta sortzetiko katarataren arrazoiak baztertu edo bilatuko dituztela. "Gure asmoa da balorazio orokor bat egitea, kirurgia hori ahalik eta berme handienarekin egin dadin", gaineratu du.

Era berean, Ana Soto anestesiologoaren hitzetan, "pazienteak interbentzio kirurgikorako baldintza egokiak betetzen dituen baieztatzeko behar den balorazio preanestesikoa egingo dugu. Hasiera batean, orain arteko datuak ikusita, uste dugu ez dela kontraindikaziorik egongo eta dena ordenan egongo dela".

Balorazio horiek egin ondoren, umea begi barruko lente bat ezartzeko hautagaia den egiaztatuko da, eta balizko ebakuntzaren egutegia zehaztuko da.

Jarduera hori Osasunaren Mundu Erakundeak eta Europako Batzordearen Larrialdiei Erantzuteko Koordinazio Zentroak bultzatutako MEDEVAC prozeduraren barruan dago. Eusko Jaurlaritzako Osasun Sailak eta Osakidetzak 2024tik parte hartzen dute prozedura horretan.

Bi urteko haurrarekin, euskal osasun sistemak 28 gazatar artatu ditu dagoeneko, eta Arabako ESIa eta Gasteiz lehen aldiz sartu dira osasun elkartasuneko sare horretan. Horrela, Eusko Jaurlaritzako Osasun Sailak eta Osakidetzak nazioarteko osasun lankidetzarekin eta erantzun humanitarioarekin duten konpromisoa berretsi dute, Euskadiko Osasun Itunak bultzatzen duen osasun publiko unibertsalaren ereduaren barruan.