Sexu-transmisiozko infekzioen aurkako informazio- eta sentsibilizazio-kanpaina

Sexu-transmisiozko infekzioen (STI) aurkako informazio- eta sentsibilizazio-kanpaina dago martxan oraindik ere, Osasun Sailak eta Osakidetzak sustatzen dute eta bereziki gazteei zuzentzen zaie; izan ere, 15 eta 24 urte bitartean dago 4 STI bakoitzeko 1.

Kanpaina infekzio bakoitza Tinder plataformako profil bat bezala adieraztean datza; hartan, Ez matchik egin STIekin, erabili preserbatiboa lema ageri da.

Ekimena udaren hasieran abiarazi da, aisiarako eta topaketa pertsonaletarako urteko aldirik egokienean. Era berean, diagnostiko goiztiarrak nolako garrantzia duen azpimarratzen du, eta infekzio-mota horien transmisiorik ez egoteko metodo eraginkorrena preserbatiboa dela nabarmentzen du.

Gaixotasunen inguruan, horietako bat Ihesa da. Honen gainean hauxe azaldu dute Osakidetzatik:

Hies-a Giza Immunoeskasiaren Birusak (GIB) eragindako infekzioaren egoera aurreratua da. Pertsona bat infektatzen denean, GIBa bere sistema immunologikoko zeluletan sartzen da, bereziki T4 linfozitoetan, eta pixkanaka hauek suntsitzen ditu.

Infekzioaren hasieran, eta hilabete batzuetatik urte batzuetara luza daitekeen denboran, sistema immunea gai da defentsarako nahikoa zelula produzitzeko eta birusaren erreplika kontrolatzeko. Baina une batean birusek defentsak gainditzen dituzte, sistema immunitarioak okerrera egiten du eta immunoeskasia gertatzen da. Gorputzak jada ezin die aurre egin normalean kalterik egiten ez duten infekzioei eta gaixotasunei. Une horretan, hartutako immunoeskasiaren sindromea edo hies-a agertzen da. Hies-a, beraz, GIB bidezko infekzioaren modu aurreratua da.

Pertsona batek hies-a duela esaten da GIBak haren sistema immunitarioa eraitsi duenean eta "infekzio oportunistak” deitutakoak agertzen direnean. Errepikatzen den pneumonia eta tuberkulosia dira infekzio oportunisten adibideak.

Azken urteetan aurrerapen handiak egin dira birusaren jarduera geldiarazten duten tratamendu antirretrobiraletan, birusaren eragina atzeratuz edo, zenbaitetan, eragin hori saihestuz.

Organismoaren lau jariakinek bakarrik dute GIB kontzentrazio nahikoa birus hori kutsatzeko: odolak, semenak, baginako fluxuak eta ama-esneak. Horrek esan nahi du GIBa hiru modutara kutsa daitekeela: sexuaren bidez, odolaren bidez eta umeak amaren esnea hartuz.

Sexuaren bidez: preserbatiborik gabe, baginako, uzkizko edo ahoko sarketa ematen den sexu-harremanetan. Uzkizko sarketak dauka arrisku handiena; horren ondoren, baginako sarketak. Ahoaren eta genitalen arteko erlazioak ez dira hain arriskutsuak GIBerako, baina bai sexu-transmisioko infekzioetarako.

Odolaren bidez: infektatutako odolarekin kontaktuan egon diren xiringak, orratzak edo edozein tresna zorrotz partekatzean.

Amaren eta umearen artean: emakume batek GIBa duenean umeari haurdunaldian, erditzean edo edoskitzean kutsa diezaioke. Hala ere, gaur egun, mediku-kontrol egokia eta tratamendu antirretrobiral bat jarraituz arrisku hori ia desagertu egin da.

Hala ere, gaixotasun gehiago daudenez, Osakidetzak gaixotasun eta horien gainean arriskuak azaltzen ditu bere web orrian.