Jaurlaritzaren lan eskaintza publiko berriak 4.611 inskripzio izan ditu

Eusko Jaurlaritzaren Administrazio Orokorraren lan eskaintza publiko berriaren lehen deialdiak "erantzun masiboa" izan du, 4.611 pertsonak eman baitute izena "euskal enplegu publikoan inflexio puntu bat izango den hautaketa prozesu berritu honetan". 201 plazetarako erregistratutako eskabide guztietatik, 3.607 fase honetan sartutako funtzionarioen hamar eskalei dagozkie, eta 1.004 deialdiko 13 lan kategoriei.

Jaurlaritzak jakinarazi duenez, gaitasunetan oinarritutako hautaketa eredu berriaren baitan egin da deialdia. Eredu berri horren helburua da talentu eta profil berriak administraziora batzea, eraldaketa betean murgilduta dagoen administrazioaren beharrei erantzuteko eta belaunaldien arteko erreleboari aurrea hartzeko. "Kontua ez da soilik plazak betetzea, baizik eta zerbitzu publiko arinagoak, hurbilagoak eta eraginkorragoak mantentzeko eta sustatzeko pertsonak erakartzea administrazio publikora", adierazi du.

Era berean, gaitasunen araberako hautaketa eredua Eki Planaren barruan dago, eta hautagaiak ebaluatuko dira, ez bakarrik beren ezagutzengatik, baizik eta baita lanpostua betetzeko gaitasunengatik eta trebetasunengatik ere. Jurlaritzak nabarmendu du administrazioa modernizatzeko erronkan langile publikoak "aldaketaren motorra" direla, "herritarrak erdigunean jartzen dituen administrazio gizatiarrago, digitalago eta eraginkorragoa ahalbidetzeko".

Aurtengo gainerako kategoriak eta eskalak irailean eta urrian deituko dira, argitaratutako behin-behineko egutegian ikus daitekeen bezala, eta lehenengo deialdiari dagozkion azterketak urrian egingo dira.

EKI PLANA

EKI Plana Eusko Jaurlaritzak Euskadiko Administrazio Orokorreko enplegu publikoaren aro berriari erantzun integrala emateko estrategia da, eta zerbitzu publikoak indartzea eta etorkizuneko administrazioa eraikitzea du helburu.

Horretarako, planak ezagutza bultzatzen du aldaketarako palanka gisa, langile publikoen talentu eta gaitasun digital zein profesionalak indartzen ditu eta profil berriak administraziora batzeko eta belaunaldi berriei ezagutzaren transmisioa bermatzeko tresnak aurreikusten ditu belaunaldien arteko erreleboa gauzatzeko.

Ildo horretatik, gaitasunetan oinarritutako lan eskaintza publiko berriez gain, Jaurlaritzak dagoeneko abian du ezagutzaren transmisiorako tresna, erretirotik gertu dauden pertsonen esperientzia eta legatu profesionala gorde eta belaunaldi berriei ezagutza hori errazteko eta transmititzeko, zerbitzu publikoen kalitatea bermatzen jarraitzeko helburuarekin.