Landa Garapeneko Euskal Sarea eratu da, erakundeen eta eragileen arteko koordinazioa indartzeko

Landa Garapeneko Euskal Sarearen lehen bilera egin da astelehen honetan Miñaon (Araba), Eusko Jaurlaritzako Elikadura, Landa Garapen, Nekazaritza eta Arrantza sailburu Amaia Barredok zuzenduta. Erakundeen eta eragileen arteko lankidetza gune berria da, eta Euskadiko landa eremura bideratutako ekimen bateratuak sustatzeko eta politiken koordinazioa hobetzeko sortu da.

Eratze jardunaldiak sareko kide diren erakundeetako ia 40 ordezkari instituzional, teknikari eta landa eremuko eragile bildu ditu. Eusko Jaurlaritzako, foru aldundietako eta udal ordezkariek parte hartu dute, baita landa garapeneko elkarteek, Mendinet tokiko ekintza taldeak eta sektoreko erakundeek ere, Elikadura, Landa Garapen, Nekazaritza eta Arrantza Saileko eta Hazi Fundazioko teknikarien laguntzarekin.

Landa Garapeneko Euskal Sarealurraldean lan egiten duten erakunde eta entitateak konektatzeko xedearekin jaio da, ezagutza partekatzeko, premia komunak identifikatzeko eta landa eremuaren garapen orekatuan lagunduko duten proiektuak sustatzeko.

Bere funtzioen artean daude Europako esparruan dauden aukerak identifikatzea, Europako beste landa eremu batzuekin esperientzia berritzaileak trukatzea eta jarduera ekonomikoa, lurralde kohesioa eta landa eremuetako bizi kalitatea indartuko dituzten ekimen bateratuak abian jartzea erraztea.

Lan hori garatzeko, Landa Garapeneko Euskal Sareak funtzionamendu egitura izango du: Osoko Bilkura, Idazkaritza Teknikoa eta talde koordinatzailea, baita interes komuneko gaien inguruan aktibatuko diren lan batzordeak ere. Gune horiek balioko dute proiektu bateratuak sustatzeko, lurraldeen arteko ezagutza partekatzeko eta landa garapenean diharduten erakundeen eta eragileen arteko lankidetza indartzeko.

"Sareak aukera emango du lurraldean egunero lanean ari direnek, hau da, administrazioek, elkarteek eta tokiko eragileek, informazioa partekatzeko, erronka komunak identifikatzeko eta landa eremuaren benetako beharrei hobeto erantzungo dieten proiektuak martxan jartzeko", adierazi du Amaia Barredok.

GUNE EGONKORRA

Landa Garapeneko Euskal Sareakontsultarako, informaziorako eta aholkularitzarako gune egonkor gisa eratu da, eta Euskadiko landa garapenarekin lotutako erakunde eta entitateek parte hartuko dute.

Hain zuzen, sarean parte hartzen duteEusko Jaurlaritzako eta Araba, Bizkai eta Gipuzkoako aldundietako ordezkariek, Eudel Euskadiko Udalen Elkarteak, Arabako Kontzejuen Elkarteak, Arabako Kuadrillek, Hazi Fundazioak, landa garapeneko elkarteek, tokiko ekintza taldeek eta sektoreko erakundeek, hala nola UAGAk eta Nekaturrek. Gainera, sarea etorkizunean kide berriak hartzeko irekita dago.

Ekimenaren bidez, Eusko Jaurlaritzak landa garapenaren gobernantza indartu eta lankidetza gune iraunkor bat sendotu nahi du, euskal landa eremurako aukera berriak sustatzen laguntzeko.