Jaurlaritzak Patataren Plana aurkeztuko dio sektoreari martxoaren 5ean Arakutin

AKIS Foroaren edizio berria egingo da martxoaren 5eanArkautiko (Araba) campusean, eta Patataren Sektore Planaren eta, bereziki, hazi patataren I+G+B planaren aurkezpenean oinarrituko da, sektorearen egungo eta etorkizuneko erronkei aurre egiteko diseinatutako tresna estrategikoa baita, Eusko Jaurlaritzatik jakinarazi dutenez.

Jaurlaritzak sektore planak garatzeko egin duen apustuaren barruan antolatu da topaketa. Plan horien helburua elikadura kateko eragileen beharrei modu praktiko eta koordinatuan erantzutea da. Horrela, AKIS Foroak plataforma egokiak bihurtu dira plan horiek partekatzeko, ikerketa eta ekoizpena lotzeko eta balio kateko katebegi guztien arteko lankidetza eraginkorra sustatzeko.

"Berrikuntza erabilgarria izango da soilik sektorearekin batera eraikitzen bada. Foro hau ez da soilik informatzeko; entzuteko eta Patataren Plana indartuko duten ekarpenak jasotzeko ere bada, benetan tresna eraginkorra izan dadin", azaldu du Amaia Barredo Elikadura, Landa Garapen, Nekazaritza eta Arrantza sailburuak.

Bada, Jaurlaritzak Euskadiko patataren sektore osoa gonbidatu du topaketan aktiboki parte hartzera, hau da, ekoizleak, enpresak, sindikatuak, kudeaketa zentroak eta erakundeak. Estrategia partekatu bat zehaztea eta ezagutzaren eta berrikuntzaren bidez sektorearen lehiakortasuna indartzea da asmoa.

Jardunaldia 09:00etan hasiko da, Amaia Barredoren ongietorri instituzionalarekin. Ondoren, Neikerreko zuzendari nagusi Olatz Unamunzagak ikerketatik sektorerako ezagutza transferentzia jorratuko du, eta jarraian, Nekazaritza eta Abeltzaintzako zuzendari Oneka Zaballak Patataren Sektore Plana aurkeztuko du.

Une nagusietako bat hazi patataren I+G+B planaren aurkezpena izango da, Neikerreko Landare Ekoizpen eta Babeseko saileko arduradun Amaia Ortizen eskutik, aurreikusitako ikerketa eta garapen ildo nagusiak azalduko baititu. Ondoren, Fernando Alonso Arce patata adituak hazi patatak sektorearentzat eskaintzen dituen aukerak aztertuko ditu.

Jarraian, 11:00etatik aurrera, mahai inguru bat egingo da balio kate osoaren ordezkari nagusiekin, tartean Grupo Udapa, Garlan, Ocon, Alavesa de Patatas eta HAZI, Olatz Unamunzagaren gidaritzapean. Helburua Patataren Planaren inguruan elkarrizketa zuzena eta lankidetza sustatzea izango da. Jardunaldia parte hartzaileen ekarpenak eta iritziak jasotzeko espazio batekin amaituko da.