Mutrikuko portuko babes dikearen proiektua eguneratu eta obrak berriro lizitatuko ditu Jaurlaritzak

Eusko Jaurlaritzako Elikadura, Landa Garapen, Nekazaritza eta Arrantza Sailak erabaki du atzera egitea gaur egun lizitazio fasean dagoen Mutrikuko (Gipuzkoa) portuko babes dikea sendotzeko lanetarako obra kontratua esleitzeko prozeduran, proiektuaren aurrekontua eguneratu ahal izateko.

Jaurlaritzaren arabera, espedientearen izapidetzean egiaztatu da eraikuntza proiektua eta lizitaziorako aurrekontua prestatzeko garaian erreferentziatzat hartu zela obra idazteko unean indarrean zegoen eraikuntza sektoreko hitzarmen kolektiboa, baina lizitazioa argitaratu den unean hitzarmen berriak ordezkatu du, eta, ondorioz, aurrekontuan jasotako baldintza ekonomikoek ez dituzte barne hartzen egun aplikagarria den hitzarmenetik eratorritako eguneratzeak.

Hala, eta ildo horretatik jarraituz, egoera aztertu ondoren, Elikadura, Landa Garapen, Nekazaritza eta Arrantza Saileko zerbitzu teknikoek beharrezkotzat jo dute prezio unitarioak berrikustea eta proiektuaren aurrekontua indarrean dauden lan baldintzetara egokitzea. Sektore publikoko kontratazio araudiaren arabera, prozeduran atzera egitea da bide egokia kontratua prestatzeko fasean atzemandako gorabeherak zuzendu behar direnean, izapidetzearekin jarraitu aurretik.

Elikadura, Landa Garapen, Nekazaritza eta Arrantza Sailak berehala hasiko ditu beharrezko lanak egoera hori zuzentzeko, eraikuntza proiektua eguneratzeko eta aurrekontua indarrean dagoen lan esparrura egokitzeko. Berrikuspena amaitutakoan, kontratuaren lizitazio berria ahalik eta eperik laburrenean egingo da.