EAEko sektore publikoko langileen ordainsarien % 1,5eko igoera onartu du Jaurlaritzak

Eusko Jaurlaritzako gobernu kontseiluak 2026rako Euskal Autonomia Erkidegoko (EAE) sektore publikoaren zerbitzura dauden langileen ordainsariaren %1,5eko igoera onartu du astearte honetan. Neurria aplikatzeko, Jaurlaritzak 73.727.097 euroko inbertsioa egingo du.

Gobernantza, Administrazio Digital eta Autogobernu Sailak proposatuta, igoera 2026ko otsaileko nominan ordainduko da, eta urte bereko urtarrilaren 1etik atzerako eragina izango du. Igoera berria 2026ko urtarrilean jasotakoari gehituko zaio (%2,5), 2025. urte osoko atzerapenei dagokiena, alegia, Jaurlaritzako arduradunen arabera.

EAEko Administrazio Orokorraren, erakunde autonomoen, zuzenbide pribatuko erakunde publikoen, sozietate publikoen, fundazio publikoen eta sektore publikoko partzuergoen zerbitzura dauden funtzionarioei eta lan kontratuko langileei aplikatuko zaie igoera, baita lehendakariari, sailburuei, goi kargudunei eta parekoei, behin-behineko langileei eta zuzendaritzako langileei ere.

BESTE GAI BATZUK

Bestalde, Ana Urkiza Eusko Ikaskuntzako lehendakariak eta Eva Egiguren Medinabeitia Euneiz unibertsitateko errektoreak bi erakundeen arteko lankidetza hitzarmena sinatu dute astearte honetan. Hitzarmenak lau urteko indarraldia izango du, eta bi aldeen arteko lankidetza esparru bat eratuko da gizarte eta hezkuntza arloetan, bientzat interesgarriak diren esparruetan ikerketa eta dibulgazio proiektuak garatzeko.

Halaber, ezagutzaren zabalkundearen alde indarrak batuko dituzte, eta baliabideak partekatuko dituzte, bai giza baliabideak bai baliabide materialak, Eusko Ikaskuntzako iturriek jakinarazi dutenez.

Lehen jarduera gisa, hitzarmenak ezarri du Euneizek parte hartzea Eusko Ikaskuntza-Laboral Kutxa Gazte Saria Humanitate, Kultura, Arte eta Gizarte Zientzien arloko epaimahaian, bai eta Eusko Ikaskuntzaren Ikerketa Sustatu eta Bultzatzeko Programaren deialdian eta epaimahaian ere. Horrela, dagoeneko bertan diren euskal eremuko zortzi unibertsitateei batuko zaie.

Bestalde, Eusko Ikaskuntzak eta Euneiz unibertsitateak irakaskuntzaren osagarri izango den programa bat abian jartzeko aukera aztertuko dute, enpresekin lankidetzan ikasleei prestakuntza praktikoa eskaintzeko.

Lankidetzarako esparru hitzarmenak lau urteko indarraldia izango du, baina beste horrenbeste urtez luzatu ahal izango da, baldin eta bi aldeek hala adosten badute.