Eslovakiako ordezkaritza bat EAEn dago gizarte ekonomiaren eredua bertatik bertara ezagutzeko

Eslovakiako ordezkaritza batek zenbait eguneko bisita hasi du Euskal Autonomioa Erkidegoan (EAE) astelehen honetan, gizarte ekonomiaren eredua "sakon" eta bertatik bertara ezagutzeko, Eusko Jaurlaritzatik jakinarazi dutenez.

Ekomomia, Lan eta Enplegu Sailaren arabera, gizarte ekonomiaren euskal eredua Europan aitortuta dago bere "sendotasunagatik, berritzeko gaitasunagatik eta enplegagarritasunean eta laneratzean duen eraginagatik".

Eslovakiako jendetsuena den Presov eskualde autonomoko ordezkaritzak lehen bilera egin du astelehen honetan goizean Eusko Jaurlaritzaren egoitzan, Gasteizen, Elena Perez Barredo Lan eta Gizarte Segurantzako sailburuordearekin eta Jokin Diaz Arsuaga Gizarte Ekonomiako zuzendariarekin. Euskal lege esparruari, kooperatibismoa sustatzeko politikei eta laneratzeko enpresei laguntzeko neurriei buruzko xehetasunak aztertu dituzte.

Europako Batzordearen Taiex-Regio programaren esparruan antolatu da misioa, eta hainbat helburu ditu, besteak beste, berrikuntza bultzatzea, eskualdearen administrazio gaitasunak indartzea eta tokiko erronkei nola heldu jakitea, hala nola talde zaurgarriak eta baztertuak lan merkatuan integratzea, gizarte ekonomiako esku hartzeen bidez, enplegu inklusiboak eta produktiboak sortzeko.

Astelehen honetako jardunaldian, Jaurlaritzako talde teknikoak, aholkularitza juridikoko, fiskalitate kooperatiboko eta gizarte ekonomiaren sustapeneko arduradunak barne, euskal ereduaren gakoak partekatu ditu Eslovakiako ordezkaritzarekin: araudiaren egonkortasuna, lankidetza publiko pribatua, ekosistema kooperatibo finkatua eta pertsona zaurgarrienen laneratzea bultzatzen duten erakundeen sarea.

Gasteizen egindako bileren ondoren, ordezkaritzak Euskadin barrena jarraituko du bidaia, besteak beste, Gizarte Zerbitzu Integratuak, ASLE, Gizatea, EHLABE, Lantegi Batuak, Koopera eta Mondragon Taldea bisitatuz. Esperientzia horiei esker, Presov eskualdeak "bertatik bertara ezagutuko ditu enpresa lehiakortasuna, gizarte kohesioa eta enplegu inklusiboa uztartzen dituzten ekimenak".

BISITA, NOIZ ARTE?

Bisita asteazkenera arte egingo da, urtarrilaren 28ra arte, eta eskualde mailako administrazioek politika berritzaileak diseinatzeko duten gaitasuna indartzeko Europako estrategiaren parte da. Eusko Jaurlaritzako Ekonomia, Lan eta Enplegu Sailak, anfitrioi gisa, berretsi egin du horrela "gizarte ekonomian nazioarteko erreferente gisa eta Europar Batasunaren barruko eskualdeen arteko lankidetzan bazkide aktibo gisa duen eginkizuna".

Eslovakiako ipar ekialdean dagoen Presov eskualde autonomoak merkataritza, industria arina eta zuraren sektorea ditu nagusi, eta historikoki altuak izan dira langabezia tasak (%17,88koa, Estatukoa %13,5ekoa denean).