Imanol Pradales Eusko Jaurlaritzako lehendakariak eta Eluned Morgan Galesko lehen ministroak bi gobernuen arteko elkar ulertzeko memoranduma berritu dute ostegun honetan Gasteizko Ajuria Enea Jauregian egindako harrera ofizialean, gaur egungo erronka globalei aurre egiteko helburuarekin.

Galesko agintariak Euskadira egindako bisita instituzionalaren esparruan sinatu da akordio berria, eta jarraipena emango dio 2018an lehen aldiz izenpetutako eta 2021ean luzatutako akordioari, nazioarteko testuinguruko egungo erronka politiko, ekonomiko eta sozialetara egokitzeko, Jaurlaritzatik jakinarazi dutenez.

Bi gobernuek partekatzen dituzten demokrazia, gizarte kohesioa, giza garapen jasangarria, kultur eta hizkuntza identitate propioak eta autogobernu handiagoaren aldeko apustua moduko balioetan oinarritutako aldebiko harreman estrategikoa finkatuko du akordioak.

Jaurlaritzatik nabarmendu dute Euskadi eta Gales "estatu egituretan txertatutako nazio historikoak" direla, eta "ibilbide paraleloak" dituztela zenbait arlotan, hala nola industrializazio handian, birmoldaketa ekonomikoko prozesuetan eta industria aurreratuaren, teknologiaren, berrikuntzaren eta trantsizio energetikoaren inguruko orainaldi komunean.

BALORAZIOA

Esparru horretan, EAEko Gobernuko lehendakariak azpimarratu du "oso garrantzitsua" dela antzeko profilak dituzten lurraldeen artean aliantzak indartzea, erronka globalei elkarrekin aurre egiteko.

Memoranduma sinatu ondoren egindako adierazpen instituzionalean Pradalesek nabarmendu duenez, "trantsizio hirukoitzarekin lotutako esparruen inguruko proiektu partekatuei bultzada handiagoa ematea ahalbidetuko digu".

"Gaur, gure gizarteen eta Europaren lehiakortasunean, segurtasunean eta ongizatean lagundu nahi duten bi naziok aurrerapausoa emango dugu. Ez indarraren arrazoitik, arrazoiaren indarretik baizik", gaineratu du.

Era berean, azpimarratu du Euskadik beste aurrerapauso bat ematen duela bidelagun gisa elkar ulertzeko memorandumaren bidez, eta erronka estrategiko ezberdinetan partekatutako proiektuak martxan jartzen jarraituko duela. Horrela, akordioaren berritzea une garrantzitsuan datorrela ziurtatu du: "Inoiz baino beharrezkoagoa da balio demokratikoak defendatzea eta Europa indartzea".