Jaurlaritzak 250.000 euro erabiliko ditu udalei laguntzeko trafikoa baretzeko jarduerak abiatzen

Susana Garcia Chueca Eusko Jaurlaritzako Mugikortasun Jasangarriaren sailburuak iragarri du 250.000 euroko kontu sail bat esleituko dela 2026ko aurrekontuetan, Euskadiko udalerri txikienei laguntzeko Euskadiko Mugikortasun Jasangarriaren Planean jasotako trafikoa baretzeko jarduketak abian jartzen.

Metrex Europako eskualdeen eta metropoli eremuen sarearen udazkeneko konferentzian parte hartu du Garcia Chuecak ostegun honetan, Irunen, eta Euskadiko Mugikortasun Jasangarriaren Planaren edukia azaldu du.

Plana "hurrengo hamarkadarako ibilbide orria" da, eta asteazkenean argitaratu zen behin-behineko onarpena. Izapideak datozen hiletan amaituko dira, herritarrentzako prozesu parte hartzaile zabalaren ondoren 742 alegazio jasota, eta 2026a izango da, beraz, lehen urtea.

BESTE DATU BATZUK

Euskadiko garraio arduradunak azaldu duenez, planak 122 jarduketa zehatz jasotzen ditu epe labur, ertain eta luzera. Horien artean, Mugikortasun Jasangarriaren Legetik harago doazen batzuk daude, eta zenbait gomendio ematen ditu, hala nola trafikoa baretzeko neurriak tamaina ertaineko udalerrietara zabaltzea -25.000 eta 50.000 biztanle arteko udalerrietara-; 50.000 biztanletik gorako udalerriei gehituta, Euskadiko biztanleriaren %73ri eragingo dio.

"Hala, Euskadiko biztanleriaren %73 bizi den hiriguneetan neurri espezifiko berriak egon litezke, ibilgailu pribatuaren ordez mugikortasun aktiboa eta garraio publikoa lehenesteko. Eta, horretarako, 2026an, Mugikortasun Jasangarriaren Planean jasotako neurriak abiarazten lagunduko diegu hori betetzeko betebeharra ez duten udalerriei", azaldu du.

Mugikortasun Jasangarriaren Planak hamar urte iraungo ditu eta Euskadin egunero egiten diren 6,5 milioi joan-etorrietan ibilgailu pribatuaren erabilera murriztea du helburu, joan-etorrien %30 modu horretan egiten baitira.