Garraio publikoan egindako ekimen berritzaileak ezagutuko ditu Jaurlaritzak Eslovenian eta Austrian

Eusko Jaurlaritzako Mugikortasun Jasangarriaren Saileko ordezkaritza batek bidaia hasi du Esloveniako eta Austriako hainbat hiritan barrena asteazken honetan, garraio publikoarekin erlazionatuta egindako ekimen berritzaileak bertatik bertara ezagutzeko eta esperientziak trukatzeko asmoz.

Jaurlaritzatik jakinarazi dutenez, topaketa mugaz gaindiko mugikortasun jasangarria sustatzeko Crosusmob proiektu europarraren parte da. Bertan, Euskadik bazkide nagusi gisa hartzen du parte Euskal Trenbide Sarearen bidez, Europako beste bost herrialdetako erakundeekin batera.

Miguel Angel Paez Azpiegitura eta Mugikortasun Jasangarriaren sailburuordea buru den ordezkaritza Loly de Juan Garraio Azpiegituretako zuzendariak eta Sara Barreal Mugikortasun Jasangarrirako Estrategiako zuzendariak osatuko dute.

Bada, sektore anitzeko bileretan parte hartuko dute asteazken honetan goizez Esloveniako hiriburu Ljubljanan, gaindiko eskualdeko garraioko beste administrazio batzuetako arduradunekin eta teknikariekin batera.

ARRATSALDEAN

Hala, eta ildo horretatik jarraituz, Eusko Jaurlaritzatik prentsa-ohar baten bitartez jakinarazi dutenez, zehazki, arratsaldean, Esloveniako hiriburutik Austriako Villach hirira joango dira autobusez, herrialde desberdinetakoak diren bi hiri lotzen dituen trenean itzultzeko.

Bisitek balioko dute mugaz gaindiko garraioa egiteko administrazioek gainditu behar izan dituzten arazoak eta soluzioak azaltzeko eta kontrastatzeko eta sor daitezkeen eragozpen teknikoak eta txartelen bateratzea azaltzeko.